यशवंतराव चव्हाण सेंटरतर्फे शरद पवार इन्स्पायर फेलोशिपची घोषणा

एज्युवार्ता न्यूज नेटवर्क

यशवंतराव चव्हाण सेंटरतर्फे देण्यात येणाऱ्या ‘शरद पवार इन्स्पायर फेलोशिप’च्या सहाव्या वर्षाची घोषणा सेंटरच्या कार्याध्यक्ष खासदार सुप्रिया सुळे यांनी बुधवारी (१२ ऑगस्ट) केली. कृषी, साहित्य, शिक्षण आणि बालशिक्षण क्षेत्रातील गुणवंतांना या फेलोशिपद्वारे प्रोत्साहन दिले जाते. शिक्षण क्षेत्रातील फेलोशिपसाठी आजपासून, तर कृषी, साहित्य आणि बालशिक्षण क्षेत्रातील फेलोशिपसाठी १५ ऑगस्टपासून ऑनलाइन अर्ज प्रक्रिया सुरू होणार आहे.

खासदार शरद पवार यांच्या प्रदीर्घ सार्वजनिक आणि सामाजिक कारकिर्दीला अभिवादन करण्यासाठी ज्येष्ठ अणुशास्त्रज्ञ डॉ. अनिल काकोडकर यांच्या अध्यक्षतेखाली या फेलोशिप उपक्रमाची सुरुवात करण्यात आली. या माध्यमातून विविध क्षेत्रांमध्ये उल्लेखनीय कार्य करणाऱ्या आणि सकारात्मक बदल घडविण्याची क्षमता असलेल्या व्यक्तींना प्रोत्साहन दिले जाते.

यंदा शरद पवार इन्स्पायर फेलोशिप इन ॲग्रीकल्चर अंतर्गत ४०, शरद पवार इन्स्पायर साहित्य फेलोशिप अंतर्गत १२, शरद पवार इन्स्पायर शिक्षण फेलोशिप अंतर्गत ३० आणि शरद पवार इन्स्पायर बालशिक्षण फेलोशिप अंतर्गत १० अशा एकूण ९२ फेलोंची निवड करण्यात येणार आहे.

कृषी क्षेत्रातील फेलोशिपसाठी ॲग्रीकल्चरल डेव्हलपमेंट ट्रस्ट, बारामती आणि सह्याद्री फार्म्स, नाशिक, तर शिक्षण क्षेत्रातील फेलोशिपसाठी एमकेसीएल फाउंडेशनचे सहकार्य लाभत आहे. कृषी फेलोशिपसाठी प्रो. निलेश नलावडे, शिक्षण फेलोशिपसाठी विवेक सावंत, साहित्य फेलोशिपसाठी डॉ. करुणा गोखले आणि बालशिक्षण फेलोशिपसाठी नीलेश निमकर हे मुख्य समन्वयक म्हणून काम पाहत आहेत.

ऑनलाइन अर्जाची अंतिम मुदत १५ ऑक्टोबर २०२६ असून त्यानंतर अर्ज स्वीकारले जाणार नाहीत. प्राप्त प्रस्तावांची तज्ज्ञांच्या मार्गदर्शनाखाली १६ ऑक्टोबर ते २० नोव्हेंबरदरम्यान निवड प्रक्रिया पूर्ण केली जाईल. निवड झालेल्या फेलोंची घोषणा १ डिसेंबर २०२६ रोजी फेलोशिपच्या संकेतस्थळावर करण्यात येणार आहे. निवड झालेल्या फेलोंना १३ डिसेंबर २०२६ रोजी मुंबईतील यशवंतराव चव्हाण सेंटर येथे फेलोशिप प्रदान करण्यात येणार आहे.

कृषी, साहित्य, शिक्षण आणि बालशिक्षण क्षेत्रातील इच्छुकांनी www.sharadpawarfellowship.com या संकेतस्थळावर ऑनलाइन अर्ज करावा, असे आवाहन सुप्रिया सुळे यांनी केले आहे.

“ही फेलोशिप केवळ आर्थिक मदत किंवा सन्मान नसून समाजात सकारात्मक बदल घडविण्यासाठी तरुणांना मिळालेले सामर्थ्यशाली व्यासपीठ आहे. तरुणांच्या कल्पना, ऊर्जा आणि स्वप्नांना नवपरिवर्तनाच्या प्रवासात सहभागी करून घेणे हा या उपक्रमाचा उद्देश आहे,” असे सुळे यांनी सांगितले.

या फेलोशिपला पहिल्या वर्षापासून मिळत असलेल्या उत्स्फूर्त प्रतिसादाबद्दल त्यांनी सर्वांचे आभार मानले. मागील पाच वर्षांत फेलोशिप मिळालेल्या सर्व फेलोंचे अभिनंदन करून ते विविध क्षेत्रांत उत्तम काम करत असल्याबद्दल समाधान व्यक्त केले. तसेच इच्छुकांनी या संधीचा लाभ घेत आवर्जून अर्ज करावा, असे आवाहन त्यांनी केले.