सावित्रीबाई फुले पुणे विद्यापीठात ‘नामविस्तार दिन’ उत्साहात
सावित्रीबाई फुले यांच्या शैक्षणिक व सामाजिक कार्याचा सन्मान म्हणून ९ ऑगस्ट २०१४ रोजी पुणे विद्यापीठाचा नामविस्तार करून ‘सावित्रीबाई फुले पुणे विद्यापीठ’ असे नामकरण करण्यात आले. या ऐतिहासिक प्रवासाचा आणि सावित्रीबाईंच्या योगदानाचा कार्यक्रमात पुनरुच्चार करण्यात आला.
Eduvarta
एज्युवार्ता न्यूज नेटवर्क
सावित्रीबाई फुले पुणे विद्यापीठात ९ ऑगस्ट रोजी ‘नामविस्तार दिन’ उत्साहात साजरा करण्यात आला. या निमित्ताने आयोजित अभिवादन कार्यक्रमात विद्यापीठाचे कुलगुरू प्रा. डॉ. सुरेश गोसावी यांच्या हस्ते क्रांतीज्योती सावित्रीबाई फुले यांच्या पुतळ्यास पुष्पहार अर्पण करून अभिवादन करण्यात आले.
या प्रसंगी प्र-कुलगुरू प्रा. डॉ. पराग काळकर, अधिसभा सदस्य प्रा. डॉ. राजेंद्र घोडे, परीक्षा व मूल्यमापन मंडळाचे संचालक डॉ. राजेंद्र तलवारे, अधिष्ठाता डॉ. सदानंद बनसोडे, डॉ. रावसाहेब लटपटे, डॉ. धनंजय मंडलिक, विभागप्रमुख प्रा. डॉ. विजय खरे, प्रा. डॉ. विलास आढाव, क्रांतीवीर बिरसा मुंडा अध्यासनाचे प्रमुख डॉ. अविनाश आडे यांच्यासह विविध विभागांचे प्रमुख, प्राध्यापक, अधिकारी, कर्मचारी आणि विद्यार्थी मोठ्या संख्येने उपस्थित होते.
सन १८४८ मध्ये भिडेवाड्यातून सुरू झालेल्या स्त्री शिक्षणाच्या चळवळीने महाराष्ट्राच्या सामाजिक परिवर्तनाला नवी दिशा दिली. सावित्रीबाई फुले यांच्या शैक्षणिक व सामाजिक कार्याचा सन्मान म्हणून ९ ऑगस्ट २०१४ रोजी पुणे विद्यापीठाचा नामविस्तार करून ‘सावित्रीबाई फुले पुणे विद्यापीठ’ असे नामकरण करण्यात आले. या ऐतिहासिक प्रवासाचा आणि सावित्रीबाईंच्या योगदानाचा कार्यक्रमात पुनरुच्चार करण्यात आला.
सावित्रीबाई फुले यांच्या विचारांचा वसा आणि वारसा पुढे नेत विद्यापीठाच्या शैक्षणिक व सामाजिक प्रगतीची वाटचाल अधिक जोमाने सुरू ठेवण्याचा संकल्प यावेळी करण्यात आला.
