देशभक्तीच्या सुरांनी भारावले वातावरण; एमईएसच्या शाळेचा उपक्रम

एज्युवार्ता न्यूज नेटवर्क 

बारामती येथील महाराष्ट्र एज्युकेशन सोसायटीच्या हरिभाऊ गजानन देशपांडे इंग्लिश मिडीयम स्कूलच्या ‘कलावर्धिनी’ उपक्रमांतर्गत आंतरशालेय देशभक्तीपर समूहगान स्पर्धेचे उत्साहात आयोजन करण्यात आले. क्रांती दिनाच्या पार्श्वभूमीवर आयोजित या स्पर्धेत विद्यार्थ्यांनी देशभक्तीपर गीतांचे सुरेल आणि जोशपूर्ण सादरीकरण करत उपस्थितांना मंत्रमुग्ध केले.

या स्पर्धेचा उद्देश विद्यार्थ्यांमध्ये देशभक्तीची भावना जागृत करणे, सांघिक गायनाची आवड निर्माण करणे आणि त्यांच्या कलागुणांना वाव देणे हा होता. कार्यक्रमाची सुरुवात परीक्षक सौ. स्मृती इंगळे, सौ. गौरी नातू आणि शाळेच्या मुख्याध्यापिका सौ. सोनाली क्षीरसागर यांच्या हस्ते सरस्वती पूजन, दीपप्रज्वलन व सरस्वती स्तवनाने झाली.

या स्पर्धेत म.ए.सो.च्या कै.गजानन भिवराव देशपांडे मराठी माध्यम शाळा, निर्मला हरिभाऊ देशपांडे मुलींची मराठी माध्यम शाळा, अजितदादा इंग्लिश मिडीयम स्कूल, भक्तिवेदांत इंग्लिश मिडीयम स्कूल आणि हरिभाऊ गजानन देशपांडे इंग्लिश मिडीयम स्कूल या शाळांमधील प्राथमिक व माध्यमिक विभागातील विद्यार्थी गटांनी सहभाग घेतला. विद्यार्थ्यांच्या सादरीकरणामुळे संपूर्ण परिसर देशभक्तीच्या भावनेने भारावून गेला.

प्रास्ताविकात मुख्याध्यापिका सौ. सोनाली क्षीरसागर यांनी ‘कलावर्धिनी’ उपक्रमांतर्गत शाळेत राबविण्यात येणाऱ्या विविध उपक्रमांची माहिती दिली. अशा स्पर्धांमुळे विद्यार्थ्यांचा आत्मविश्वास, संघभावना, सर्जनशीलता आणि राष्ट्रप्रेम अधिक दृढ होत असल्याचे त्यांनी सांगितले.

संगीत क्षेत्रातील सौ. स्मृती इंगळे आणि सौ. गौरी नातू यांनी परीक्षक म्हणून काम पाहिले. त्यांनी विद्यार्थ्यांच्या सादरीकरणाचे परीक्षण करून मार्गदर्शन केले.

निकालानंतर शाळेच्या स्थानिक सल्लागार समितीचे सदस्य पी. बी. कुलकर्णी यांच्या उपस्थितीत परीक्षकांच्या हस्ते सर्व सहभागी विद्यार्थी गटांना प्रशस्तीपत्रके देऊन गौरविण्यात आले. प्राथमिक व माध्यमिक विभागातील प्रथम, द्वितीय आणि तृतीय क्रमांकाच्या संघांना आकर्षक ट्रॉफी देऊन सन्मानित करण्यात आले.

प्राथमिक विभागात हरिभाऊ गजानन देशपांडे इंग्लिश मिडीयम स्कूल, बारामतीच्या विद्यार्थी गटाने विजेतेपद पटकावले, तर माध्यमिक विभागात भक्तिवेदांत इंग्लिश मिडीयम स्कूलच्या विद्यार्थी गटाने प्रथम क्रमांक मिळविला. विजेत्या संघांचे उपस्थित मान्यवर, शिक्षक आणि विद्यार्थ्यांनी टाळ्यांच्या कडकडाटात अभिनंदन केले.

या कार्यक्रमास शाला समितीचे अध्यक्ष श्री. अजय पुरोहित, महामात्र डॉ. गोविंद कुलकर्णी, मएसो नियामक मंडळाचे सदस्य राजीव देशपांडे, स्थानिक सल्लागार समितीचे सदस्य पी. बी. कुलकर्णी आणि मुख्याध्यापिका सौ. सोनाली क्षीरसागर यांचे मार्गदर्शन लाभले.

स्पर्धेच्या यशस्वी आयोजनासाठी संगीत शिक्षिका कु. श्रुती पवार आणि शिक्षक श्री. सुनील साळुंखे यांनी विशेष परिश्रम घेतले. कार्यक्रमाचे सूत्रसंचालन शिक्षिका सुवर्णा पाठक यांनी केले.

देशभक्ती, सांघिकता आणि संगीताची सुंदर सांगड घालणाऱ्या या स्पर्धेमुळे विद्यार्थ्यांना आपल्या कलागुणांचे सादरीकरण करण्याची संधी मिळाली. राष्ट्रप्रेमाची भावना दृढ करणारा हा उपक्रम सहभागी विद्यार्थी, शिक्षक आणि उपस्थितांसाठी संस्मरणीय ठरला.