एमबीबीएस-बीडीएस प्रवेश प्रक्रियेला सुरुवात; मॅनेजमेंटच्या जागा सीईटी भरणार; अर्जाची मुदत १२ ऑगस्ट
कॅप फेऱ्यांनंतर शिल्लक राहणाऱ्या तसेच संस्थात्मक कोट्यातील जागा पूर्वी संबंधित संस्थांकडून भरल्या जात होत्या. आता या सर्व जागा सीईटी कक्षाकडून ऑनलाईन पद्धतीने भरल्या जाणार आहेत.
Eduvarta
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा (सीईटी) कक्षामार्फत शैक्षणिक वर्ष २०२६-२७ साठी वैद्यकीय शिक्षणातील एमबीबीएस (MBBS) आणि बीडीएस (BDS) अभ्यासक्रमांच्या केंद्रीभूत प्रवेश प्रक्रियेला बुधवारपासून सुरुवात झाली. प्रवेशासाठी ऑनलाईन अर्ज नोंदणीची अंतिम तारीख १२ ऑगस्ट २०२६ असून, पहिली गुणवत्ता यादी २३ ऑगस्ट २०२६ रोजी जाहीर करण्यात येणार आहे.यंदा आणखी एक महत्त्वाचा निर्णय घेण्यात आला आहे. कॅप फेऱ्यांनंतर शिल्लक राहणाऱ्या तसेच संस्थात्मक कोट्यातील जागा पूर्वी संबंधित संस्थांकडून भरल्या जात होत्या. आता या सर्व जागा सीईटी कक्षाकडून ऑनलाईन पद्धतीने भरल्या जाणार आहेत.
यंदा नीट (NEET) २०२६ मध्ये पात्र ठरलेल्या विद्यार्थ्यांनाच या प्रवेश प्रक्रियेसाठी नोंदणी करता येणार आहे. सीईटी कक्षाने सर्व पात्र विद्यार्थ्यांनी निर्धारित मुदतीत अर्ज सादर करण्याचे आवाहन केले आहे.
यावर्षी प्रवेश प्रक्रियेत महत्त्वाचा बदल करण्यात आला असून, सर्व आवश्यक मूळ कागदपत्रांच्या रंगीत स्कॅन प्रती पोर्टलवर अपलोड करणे अनिवार्य करण्यात आले आहे. आवश्यक कागदपत्रे अपलोड न करणाऱ्या विद्यार्थ्यांचा अर्ज ग्राह्य धरला जाणार नाही. तसेच दस्तऐवज पडताळणीसाठी विद्यार्थ्यांना मूळ कागदपत्रांसह पडताळणी केंद्रावर प्रत्यक्ष उपस्थित राहावे लागणार आहे.
आरक्षण व विशेष प्रवर्गासाठी आवश्यक कागदपत्रे
-
दिव्यांग (PWD) विद्यार्थ्यांनी वैद्यकीय मंडळाने जारी केलेले पात्रता प्रमाणपत्र सादर करणे आवश्यक आहे.
-
ईडब्ल्यूएस (EWS) प्रवर्गातील विद्यार्थ्यांनी शैक्षणिक वर्ष २०२६-२७ साठी वैध असलेले प्रमाणपत्र सादर करावे.
-
आरक्षण प्रवर्गातील विद्यार्थ्यांनी जात प्रमाणपत्र, जात वैधता प्रमाणपत्र आणि आवश्यक असल्यास नॉन-क्रीमी लेयर प्रमाणपत्र सादर करणे बंधनकारक आहे.
-
ओबीसी व एसईबीसी विद्यार्थ्यांना जात वैधता प्रमाणपत्र सादर करण्यासाठी कॅप नोंदणीनंतर सहा महिन्यांची अतिरिक्त मुदत देण्यात आली आहे.
एनआरआय विद्यार्थ्यांसाठी स्वतंत्र नोंदणी
एनआरआय विद्यार्थ्यांनी पात्रतेच्या पडताळणीसाठी ११ ऑगस्ट २०२६ पूर्वी विदेशी उमेदवार नोंदणी पोर्टलवर नोंदणी करणे आवश्यक आहे. एनआरआय विद्यार्थ्यांना गुणवत्तेनुसार केवळ १५ टक्के संस्थात्मक कोट्यातील जागांसाठीच प्रवेश मिळणार आहे.
कॅप फेरी-१ चे वेळापत्रक
| उपक्रम | कालावधी |
|---|---|
| ऑनलाईन अर्ज नोंदणी | ६ ते १२ ऑगस्ट २०२६ |
| नोंदणी शुल्क भरणे | ६ ते १३ ऑगस्ट २०२६ |
| कागदपत्रे अपलोड करणे | ६ ते १३ ऑगस्ट २०२६ |
| दस्तऐवज पडताळणी | ७ ते १४ ऑगस्ट २०२६ |
| नोंदणीकृत उमेदवारांची यादी | १५ ऑगस्ट २०२६ |
| अंतिम गुणवत्ता यादी | १८ ऑगस्ट २०२६ |
| पसंतीक्रम भरणे | १९ ते २२ ऑगस्ट २०२६ (सायं. ५.३० पर्यंत) |
| पहिली गुणवत्ता यादी | २३ ऑगस्ट २०२६ |
सीईटी कक्षाने विद्यार्थ्यांना अर्ज भरण्यापूर्वी सर्व आवश्यक कागदपत्रांची पूर्तता करून अंतिम मुदतीपूर्वी नोंदणी पूर्ण करण्याचे आवाहन केले आहे. वैद्यकीय प्रवेश प्रक्रियेत यंदा कागदपत्रांच्या पडताळणीला विशेष महत्त्व देण्यात आले असून, अपूर्ण अर्जांचा कोणत्याही टप्प्यावर विचार केला जाणार नाही, असे स्पष्ट करण्यात आले आहे.
