मोठी बातमी:अभियांत्रिकी प्रवेशासाठी स्वीकृती शुल्क वाढीचा निर्णय मागे; सीईटीकडून स्पष्टीकरण
मागील वर्षी विद्यार्थ्यांनी अशा प्रकारे सुमारे ३५ हजार जागा अडवून ठेवल्या होत्या. या पार्श्वभूमीवर सीईटी कक्षाने प्रथम वर्ष अभियांत्रिकी प्रवेशासाठी स्वीकृती शुल्काच्या रचनेत बदल करण्याचा प्रस्ताव तयार केला होता.
Eduvarta
एज्युवार्ता न्यूज नेटवर्क
अभियांत्रिकी अभ्यासक्रमाच्या (Engineering Curriculum) प्रवेश प्रक्रियेत (Admission process) ‘बेटरमेंट’ पर्यायाचा गैरफायदा घेत अनेक विद्यार्थी चांगल्या महाविद्यालयांच्या जागा अडवून ठेवतात, मात्र अखेर प्रवेश घेत नाहीत. यामुळे गुणवंत विद्यार्थ्यांची चांगल्या संस्थांमध्ये प्रवेश घेण्याची संधी हुकते आणि महाविद्यालयांमध्ये मोठ्या प्रमाणात जागा रिक्त राहतात. या समस्या रोखण्यासाठी राज्य सामाईक प्रवेश परीक्षा कक्षाने (Common Entrance Examination Council) केंद्रीभूत प्रवेश प्रक्रियेत जागा स्वीकृती शुल्क वाढवण्याचा (Hike in seat acceptance fee cancelled) निर्णय घेतला होता. मात्र, विद्यार्थी, पालक आणि विद्यार्थी संघटनांकडून झालेल्या तीव्र विरोधानंतर सीईटी कक्षाने हा निर्णय रद्द केला. त्यामुळे आता जुनेच स्वीकृती शुल्क लागू (Current acceptance charges applicable) राहणार आहे.
गेल्या काही वर्षांच्या प्रवेश प्रक्रियेचा आढावा घेतला असता, अनेक विद्यार्थी एकापेक्षा अधिक पर्याय स्वीकारून जागा रोखून धरतात. यामुळे प्रवेश प्रक्रिया लांबते आणि गुणवत्तेनुसार पात्र विद्यार्थ्यांना उपलब्ध जागा दिसत नाहीत. मागील वर्षी विद्यार्थ्यांनी अशा प्रकारे सुमारे ३५ हजार जागा अडवून ठेवल्या होत्या. या पार्श्वभूमीवर सीईटी कक्षाने प्रथम वर्ष अभियांत्रिकी प्रवेशासाठी स्वीकृती शुल्काच्या रचनेत बदल करण्याचा प्रस्ताव तयार केला होता.
नव्या प्रस्तावानुसार, बेटरमेंटद्वारे पहिल्यांदा नवी जागा स्वीकारताना एक हजार रुपये, दुसऱ्यांदा दोन हजार रुपये आणि तिसऱ्यांदा तीन हजार रुपये स्वतंत्र जागा स्वीकृती शुल्क भरावे लागणार होते. हे शुल्क परत न मिळणारे प्रक्रिया शुल्क असल्याने विद्यार्थ्यांवर अतिरिक्त आर्थिक भार पडणार होता. गुणवत्तेनुसार अधिक चांगल्या महाविद्यालयात प्रवेश मिळवण्यासाठी प्रयत्न करणाऱ्या विद्यार्थ्यांना याचा मोठा फटका बसला असता.
विद्यार्थी संघटनांनी या शुल्कवाढीला तीव्र विरोध दर्शवत विद्यार्थी आणि पालकांच्या हिताचे रक्षण करण्याची मागणी केली. अखेर व्यापक संताप लक्षात घेऊन सीईटी कक्षाने घूमजाव करत निर्णय मागे घेतला. यामुळे प्रवेश प्रक्रिया पूर्वीप्रमाणे सुरळीत होईल अशी अपेक्षा व्यक्त केली जात आहे. मात्र, जागा अडवण्याच्या समस्या सोडवण्यासाठी सीईटी कक्षाने भविष्यात अन्य प्रभावी उपाययोजना करण्याची गरज विद्यार्थी संघटनांनी व्यक्त केली आहे.
