SPPU : अधिष्ठाता, परीक्षा नियंत्रक भरती पुन्हा लांबणीवर 

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University) चारही विद्याशाखांचे अधिष्ठाता (Dean) पद सुमारे अडीच ते तीन वर्षांपासून रिक्त आहे. त्याचप्रमाणे काही महिन्यांपूर्वी विद्यापीठाच्या परीक्षा व मूल्यमापन मंडळाचे संचालक (Director of Examination and Evaluation Board)पद ही रिक्त झाले. विद्यापीठाने या पदांच्या भरतीसाठी जाहिरात प्रसिद्ध करून 12 डिसेंबर पर्यंत अर्ज मागवले होते परंतु अर्ज सादर करण्यासाठी विद्यापीठ प्रशासनाने येत्या 28 डिसेंबर पर्यंत मुदतवाढ देण्याचा निर्णय घेतला आहे. त्यामुळे प्राध्यापक भरती बरोबरच आता अधिष्ठाता व परीक्षा नियंत्रक पदभरती सुद्धा लांबणीवर गेली आहे.

सावित्रीबाई फुले पुणे विद्यापीठाचे माजी कुलगुरू डॉ. नितीन करमळकर यांच्या कार्यकाळात पूर्ण वेळ अधिष्ठाता यांची पदे नियुक्त करण्यात आली होती. त्यानंतर प्रभारी कुलगुरू पदी डॉ. कारभारी काळे यांची नियुक्ती झाली. कारभारी काळे यांच्या कार्यकाळापासून विद्यापीठात प्रभारी अधिष्ठाता म्हणून विद्यापीठातील प्राध्यापकांची नेमणूक करण्यात आली. विद्यापीठाचे कुलगुरू डॉ. सुरेश गोसावी यांनी पदभार स्वीकारल्यानंतरही प्रभारी अधिष्ठाताच नियुक्त करावे लागले.दोन ते तीन वेळा जाहिरात प्रसिध्द करूनही पूर्णवेळ पद भरणे शक्य झाले नाही. त्यातच गेल्या काही महिन्यांपूर्वी विद्यापीठाच्या परीक्षा व मूल्यमापन मंडळाचे संचालक डॉ. महेश काकडे यांनी पदभार सोडल्यानंतर प्रभारी परीक्षा नियंत्रक पदी डॉ. प्रभाकर देसाई यांची नेमणूक करण्यात आली. त्यामुळे विद्यापीठातर्फे अधिष्ठाता व परीक्षा संचालक पदाच्या भरतीसाठी जाहिरात प्रसिद्ध करण्यात आली. इच्छुक उमेदवारांना 12 डिसेंबरपर्यंत अर्ज करण्यास मुदत देण्यात होती. परंतु ही मुदत आता वाढविण्यात आली आहे.

विद्यापीठाच्या प्रभारी कुलसचिव डॉ.ज्योती भाकरे यांनी प्रसिद्ध केलेल्या परिपत्रकानुसार या दोन्ही पदांसाठी आता 13 डिसेंबर ते 28 डिसेंबरपर्यंत ऑनलाईन पद्धतीने अर्ज करता येणार आहे. तर येत्या 5 जानेवारी पर्यंत अर्जाची हार्ड कॉपी सबमिट करावी लागणार आहे. त्यामुळे केवळ प्राध्यापकांची पदेच नाही तर अधिष्ठाता व परीक्षा व मूल्यमापन मंडळाच्या संचालक पदी नव्या व्यक्तींची नियुक्ती होण्यासाठी पुढील वर्ष उजाडणार आहे.