विमलाबाई गरवारे हायस्कूलमध्ये प्रयोगशाळा व्यवस्थापन कार्यशाळेत अग्निशमन दलाचे प्रात्यक्षिक

एज्युवार्ता न्यूज नेटवर्क 

शिक्षण प्रबोधिनीच्या वतीने सौ. विमलाबाई गरवारे हायस्कूल येथे विज्ञान शिक्षक व प्रयोगशाळा परिचरांसाठी प्रयोगशाळा व्यवस्थापन कार्यशाळेचे आयोजन करण्यात आले. सकाळी १० ते सायंकाळी ५ या वेळेत झालेल्या या कार्यशाळेत प्रयोगशाळेतील सुरक्षितता, व्यवस्थापन आणि आपत्कालीन परिस्थितीतील उपाययोजनांबाबत मार्गदर्शन करण्यात आले.

कार्यशाळेतील विशेष सत्रात दुपारी ३.३० ते ४.४५ या वेळेत अग्निशमन दलाच्या वतीने प्रात्यक्षिक घेण्यात आले. यासाठी सुमारे १० ते १२ अग्निशमन कर्मचाऱ्यांचे पथक अग्निशमन वाहनासह उपस्थित होते. अग्निशमन कर्मचाऱ्यांनी शिक्षक, प्रयोगशाळा परिचर व विद्यार्थ्यांना आग लागण्याची कारणे, आग प्रतिबंधक उपाययोजना, अग्निशामक साधनांचा योग्य वापर तसेच आपत्कालीन परिस्थितीत घ्यावयाची खबरदारी याबाबत मार्गदर्शन केले.

यावेळी सहभागी शिक्षक व विद्यार्थ्यांना प्रत्यक्ष प्रात्यक्षिकाद्वारे अग्निसुरक्षेचा ‘हँड्स-ऑन’ अनुभव देण्यात आला. प्रयोगशाळेत काम करताना घ्यावयाची दक्षता तसेच आग लागल्यास तातडीने करावयाच्या उपाययोजनांची माहिती यावेळी देण्यात आली.

या उपक्रमामुळे शिक्षक, प्रयोगशाळा परिचर व विद्यार्थ्यांमध्ये अग्निसुरक्षेबाबत जागरूकता निर्माण होऊन आपत्कालीन परिस्थितीला सामोरे जाण्याचा आत्मविश्वास वाढण्यास मदत झाली. प्रयोगशाळेतील सुरक्षितता आणि आपत्कालीन व्यवस्थापनाच्या दृष्टीने हे प्रात्यक्षिक उपयुक्त ठरले.