थ्रोबॉल स्पर्धेत गरवारे प्रशालेच्या विद्यार्थ्यांचे उल्लेखनीय यश
बारामती येथील जिल्हा क्रीडा संकुलात झालेल्या या राज्यस्तरीय स्पर्धेत प्रशालेच्या मुलींच्या संघाने द्वितीय क्रमांक मिळवत उपविजेतेपद, तर मुलांच्या संघाने तृतीय क्रमांक पटकावला.
Eduvarta
एज्युवार्ता न्यूज नेटवर्क
थ्रोबॉल फेडरेशन ऑफ इंडिया व एशियन थ्रोबॉल फेडरेशन यांच्या संयुक्त विद्यमाने पुणे थ्रोबॉल असोसिएशनच्या वतीने आयोजित तिसरी राज्यस्तरीय ज्युनियर मुला-मुली थ्रोबॉल चॅम्पियनशिप २०२६-२७ स्पर्धेत सौ. विमलाबाई गरवारे प्रशालेच्या विद्यार्थ्यांनी उल्लेखनीय कामगिरी केली.
बारामती येथील जिल्हा क्रीडा संकुलात दि. २२ व २३ ऑगस्ट २०२६ रोजी झालेल्या या राज्यस्तरीय स्पर्धेत प्रशालेच्या मुलींच्या संघाने द्वितीय क्रमांक मिळवत उपविजेतेपद, तर मुलांच्या संघाने तृतीय क्रमांक पटकावला.
मुलींच्या संघात रिया राजू मोरे व हर्षदा दत्तू गुजले यांनी सहभाग घेतला. तसेच मुलांच्या संघात रुद्र मुकेश अहेर व लक्ष्मीकांत मोरेश्वर सुतार यांनी उत्कृष्ट खेळाचे प्रदर्शन केले.
विद्यार्थ्यांनी आपल्या कौशल्यपूर्ण खेळाने, जिद्दीने आणि सांघिक भावनेने प्रशालेच्या शिरपेचात मानाचा तुरा रोवला. त्यांच्या या यशाबद्दल प्रशालेच्या वतीने विजेत्या खेळाडूंचे अभिनंदन करण्यात आले. तसेच विद्यार्थ्यांना मार्गदर्शन करणाऱ्या क्रीडा शिक्षकांचेही कौतुक करण्यात आले.
या यशामुळे विद्यार्थ्यांच्या क्रीडा कौशल्याला नवी प्रेरणा मिळाली असून, आगामी स्पर्धांसाठी त्यांना प्रशालेच्या वतीने शुभेच्छा देण्यात आल्या.
