विज्ञान शिक्षक व प्रयोगशाळा सहाय्यकांसाठी प्रयोगशाळा व्यवस्थापन कार्यशाळा उत्साहात संपन्न

एज्युवार्ता न्यूज नेटवर्क 

महाराष्ट्र एज्युकेशन सोसायटीच्या शिक्षण प्रबोधिनीच्या वतीने विज्ञान शिक्षक व प्रयोगशाळा सहाय्यकांसाठी ‘प्रयोगशाळा व्यवस्थापन कार्यशाळे’चे आयोजन सौ. विमलाबाई गरवारे हायस्कूल येथे करण्यात आले. सकाळी १० ते सायंकाळी ५ या वेळेत झालेल्या या एकदिवसीय कार्यशाळेत सुमारे ६० विज्ञान शिक्षक व प्रयोगशाळा सहाय्यकांनी उत्स्फूर्त सहभाग घेतला.

कार्यशाळेचे उद्घाटन शाळा समितीचे अध्यक्ष श्री. अजयजी पुरोहित यांच्या हस्ते झाले. डॉ. गोविंद कुलकर्णी, सदस्य, नियामक मंडळ यांनी बीजभाषण केले. यावेळी आजीव सभासद व महामात्र डॉ. निर्भय पिंपळे यांची प्रमुख उपस्थिती होती.

कार्यशाळेत प्रयोगशाळेतील Standard Operating Procedures (SOPs), सुरक्षितता, उपकरणांची योग्य हाताळणी, देखभाल आणि कार्यक्षम व्यवस्थापन या विषयांवर तज्ज्ञांनी मार्गदर्शन केले. जीवशास्त्र प्रयोगशाळेतील SOP विषयक सत्र सौ. अपर्णा भनगे व डॉ. निर्भय पिंपळे यांनी घेतले. भौतिकशास्त्र प्रयोगशाळेतील SOP विषयावर डॉ. गोविंद कुलकर्णी यांनी, तर रसायनशास्त्र प्रयोगशाळेतील SOP विषयक मार्गदर्शन डॉ. राजेंद्र थिगळे यांनी केले.

प्रयोगशाळा सहाय्यकांसाठी स्वतंत्र समांतर सत्राचे आयोजन करण्यात आले होते. ज्येष्ठ वैज्ञानिक डॉ. विनायक शुक्ला व डॉ. डी. जी. नाईक यांनी प्रयोगशाळेतील विविध उपकरणांची दुरुस्ती, देखभाल आणि त्यांचा योग्य वापर याबाबत प्रत्यक्ष व अनुभवाधारित मार्गदर्शन केले.

कार्यशाळेच्या दुपारच्या सत्रात एरंडवणा अग्निशमन दलाच्या वतीने शाळेच्या परिसरात अग्निसुरक्षा व अग्निशमनाचे प्रत्यक्ष प्रात्यक्षिक घेण्यात आले. यामध्ये शिक्षक, प्रयोगशाळा सहाय्यक तसेच विद्यार्थ्यांनी सहभाग घेतला. आपत्कालीन परिस्थितीत घ्यावयाची खबरदारी आणि अग्निशामक साधनांचा योग्य वापर याबाबत यावेळी प्रात्यक्षिकाद्वारे माहिती देण्यात आली.

कार्यशाळेच्या यशस्वी आयोजनासाठी प्राचार्य श्री. भारमळ तसेच सौ. विमलाबाई गरवारे हायस्कूलच्या शिक्षक व शिक्षकेतर कर्मचाऱ्यांनी विशेष परिश्रम घेतले. वर्गखोल्या, प्रयोगशाळा, सभागृह, आसनव्यवस्था आणि ध्वनिव्यवस्थेची उत्कृष्ट व्यवस्था करण्यात आली. कार्यशाळेचे सूत्रसंचालन अनंत कुलकर्णी यांनी केले.

समारोप समारंभाचे अध्यक्षस्थान शिक्षण प्रबोधिनीचे अध्यक्ष डॉ. दिलीप शेठ यांनी भूषविले. डॉ. राजेंद्र थिगळे यांनी आभार मानले.

प्रयोगशाळा व्यवस्थापन अधिक सुरक्षित, शिस्तबद्ध, प्रमाणित आणि कार्यक्षम करण्याच्या दृष्टीने ही कार्यशाळा महत्त्वपूर्ण ठरली. विज्ञान अध्यापन अधिक प्रयोगाधारित, गुणवत्तापूर्ण आणि विद्यार्थी-केंद्रित करण्यासाठी हा उपक्रम उपयुक्त ठरल्याची भावना सहभागी शिक्षक व प्रयोगशाळा सहाय्यकांनी व्यक्त केली.