विद्यापीठ,कॉलेजमधून कुत्रे करा हद्दपार; यूजीसीच्या सूचना 

एज्युवार्ता न्यूज नेटवर्क 

सर्वोच्च न्यायालयाच्या (Supreme Court)आदेशानुसार विद्यापीठ अनुदान आयोगाने (University Grants Commission)देशभरातील सर्व विद्यापीठे व उच्च शिक्षण संस्थांमध्ये (Universities and higher education institutions)भटक्या कुत्र्यांचा (stray dogs-श्वानांचा) प्रवेश रोखण्यासाठी स्वतंत्र समन्वयक अधिकारी नेमावा, अशा सूचना दिल्या आहेत. उच्च शिक्षण संस्थांच्या आवारात भटक्या कुत्र्यांकडून नागरिकांना चावा घेण्याच्या घटना या चिंताजनक असल्यामुळे त्याला आळा घालण्यासाठी उपाययोजना कराव्यात, असेही विद्यापीठ आयोगाने स्पष्ट केले आहे. परिणामी आता विद्यापीठांना आपल्या परिसरातून कुत्रे पळवून लावण्याचे काम करावे लागणार आहे.

सर्वोच्च न्यायालयाने शैक्षणिक संकुलातच्या आवारात व सार्वजनिक ठिकाणी श्वानांच्या चाव्याच्या घटना वाढल्या असल्याची नोंद घेत 7 नोव्हेंबर 2025 रोजी सर्व राज्यांना , केंद्रशासित प्रदेशांना व केंद्र सरकारला ठोस उपाययोजना करण्याचे निर्देश दिले होते. या पार्श्वभूमीवर विद्यापीठ अनुदान आयोगाचे सचिव मनीष जोशी यांनी उच्च शिक्षण संस्थांसाठी मार्गदर्शकपर परिपत्रक प्रसिद्ध केले आहे. त्यानुसार भटके कुत्रे शैक्षणिक संस्थांच्या आवारात वास्तव्यास राहू नयेत, यासाठी उपाययोजना करावी. या कामासाठी समन्वयक अधिकाऱ्याची नियुक्ती करावी. तसेच संबंधित अधिकाऱ्याचे नाव व संपर्क क्रमांक संस्थेच्या मुख्य प्रवेशद्वारावर ठळकपणे प्रसिद्ध करावा, असे यूजीसीने स्पष्ट केले आहे. 

इन्स्टाग्रामला फॉलो करा: https://www.instagram.com/eduvarta_news/

भटक्या कुत्र्यांपासून सावध राहण्याबाबत विद्यार्थी व कर्मचाऱ्यांमध्ये जनजागृती करण्याबाबत भर द्यावा. कुत्रा चावल्यास तात्काळ कोणत्या उपाययोजना कराव्यात याबाबत प्रशिक्षण व जनजागृती सत्राचे आयोजन करावे. शैक्षणिक संस्थेच्या मैदानात व क्रीडा संकुल मध्ये भटके कुत्रे शिरकाव करणार नाहीत यासाठी 24 तास सुरक्षारक्षक नियुक्त करावेत, असेही यूजीसीने सूचित केले आहे.

यूजीसीच्या सचिव मनीष जोशी यांनी याबाबत याबाबत परिपत्रक प्रसिद्ध केले असून विद्यार्थी आणि कर्मचाऱ्यांच्या सुरक्षिततेची अंमलबजावणी करण्यासाठी आणि कुत्र्यांच्या चाव्याच्या घटनांना आळा घालण्यासाठी सर्वोच्च न्यायालयाच्या ७ नोव्हेंबर २०२५ च्या आदेशानुसार इतर सर्व मार्गदर्शक तत्त्वे देखील पाळावी, असे त्यात स्पष्ट केले आहे.