प्रियदर्शनी स्कूलमध्ये आषाढी एकादशी उत्साहात
टाळ-मृदुंगाच्या गजरात आणि "ज्ञानोबा-तुकाराम"च्या जयघोषाने संपूर्ण परिसर भक्तिमय वातावरणाने भारावून गेला.
Eduvarta
एज्युवार्ता न्यूज नेटवर्क
प्रियदर्शनी स्कूल, मोशी येथे आषाढी एकादशीचा पवित्र सण भक्तिमय व पारंपरिक वातावरणात मोठ्या उत्साहात साजरा करण्यात आला. विद्यार्थ्यांनी वारकरी परंपरेचे दर्शन घडविणाऱ्या विविध सांस्कृतिक कार्यक्रमांद्वारे उपस्थितांची मने जिंकली.
कार्यक्रमाची सुरुवात श्री विठ्ठल-रुक्मिणी यांच्या प्रतिमेचे पूजन व दीपप्रज्वलनाने झाली. त्यानंतर विद्यार्थ्यांनी अभंग, भजन, हरिपाठ तसेच वारकरी संप्रदायाच्या परंपरेवर आधारित सांस्कृतिक सादरीकरणे केली. वारकरी वेशभूषेत विद्यार्थ्यांनी सादर केलेली दिंडी कार्यक्रमाचे मुख्य आकर्षण ठरली. टाळ-मृदुंगाच्या गजरात आणि "ज्ञानोबा-तुकाराम"च्या जयघोषाने संपूर्ण परिसर भक्तिमय वातावरणाने भारावून गेला.
यावेळी विद्यार्थ्यांना आषाढी एकादशीचे धार्मिक, सांस्कृतिक आणि सामाजिक महत्त्व समजावून सांगण्यात आले. भक्ती, संस्कार, एकात्मता आणि भारतीय संस्कृतीचे जतन करण्याचा संदेश या कार्यक्रमातून देण्यात आला.
कार्यक्रमास विद्यार्थी, शिक्षक, पालक तसेच शाळेचे व्यवस्थापन मोठ्या संख्येने उपस्थित होते. मुख्याध्यापकांनी विद्यार्थ्यांच्या सादरीकरणाचे कौतुक करत अशा सांस्कृतिक उपक्रमांमुळे विद्यार्थ्यांमध्ये भारतीय संस्कृतीविषयी अभिमान, सामाजिक बांधिलकी आणि नैतिक मूल्यांची जोपासना होत असल्याचे सांगितले.
