पुण्यात 'फॅशन टेक्नॉलॉजी' कॉलेजला मंजूरी; शासन निर्णय प्रसिद्ध 

एज्युवार्ता न्यूज नेटवर्क 

कौशल्याधारित नवीन अभ्यासक्रम सुरू (New course Starts) करण्याच्या अनुषंगाने आता राज्य सरकारने फॅशन टेक्नॉलॉजी अभ्यासक्रमाच्या (Fashion Technology Courses) नव्या संस्थेला मान्यता (Approval of new organization) दिली आहे. एसएनडीटी विद्यापीठांतर्गत महर्षी कर्वे स्त्री शिक्षण संस्था स्कूल ऑफ फॅशन टेक्नॉलॉजी (Maharshi Karve Women's Education Institute School of Fashion Technology) ही शिक्षण संस्था नऱ्हे येथे सुरू करण्यास मान्यता दिली आहे. संस्थेत पदवी आणि पदव्युत्तर पदवीचे अभ्यासक्रम शिकविले जाणार आहेत. त्याचा शासन निर्णय जारी करण्यात आला आहे.

अखिल भारतीय तंत्रशिक्षण परिषदेने (एआयसीटीई) दिलेल्या मान्यतेनुसार २०२४-२५ या वर्षात ही संस्था सुरू केली जाणार आहे. त्यामध्ये फॅशन कम्युनिकेशन, फॅशन डिझाईन, इंटरडिसिप्लिनरी फॅशन, ज्वेलरी डिझाईन, टेक्स्टाईल डिझाईन हे पदवी अभ्यासक्रम सुरू केले जाणार आहेत. या अभ्यासक्रमासाठी मर्यादित प्रवेश असल्याने अनेकांना वंचित राहावे लागत होते. मात्र, आता यातील काही विद्यार्थ्यांना प्रवेश मिळण्याची शक्यता निर्माण झाला आहे. 

फॅशन डिझाईन अभ्यासक्रमाला १२० विद्यार्थ्यांना तर अन्य अभ्यासक्रमांना ३० विद्यार्थ्यांना प्रवेश देता येईल. पदव्युत्तर पदवीचा इंटरडिसिप्लिनरी फॅशन या अभ्यासक्रमाला ३० विद्यार्थ्यांना प्रवेश देता येणार आहे. ही संस्था कायमस्वरूपी विनाअनुदानित असेल. एआयसीटीई आणि अटींचे पालन करणे तिच्यासाठी बंधनकारक असेल. एआयसीटीईच्या मानकानुसार सुसज्ज ग्रंथालय आदी सुविधा विद्यार्थ्यांसाठी बंधनकारक आहेत, असे प्रसिद्ध करण्यात आलेल्या शासन निर्णयात म्हटले आहे.