मोठी बातमी: तंत्रज्ञान विभागाचे प्रमुख डॉ.आदित्य अभ्यंकर यांना सक्तीच्या रजेवर पाठवण्याची अधिसभेत घोषणा 

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या तंत्रज्ञान विभागाचे प्रमुख डॉ. आदित्य अभ्यंकर यांच्या निलंबनाची मागणी अधिसभा सदस्यांनी केली. त्यावर प्रोसेजर फॉलो करून अभ्यंकर यांचे निलंबन केले जाईल, असे कुलगुरू डॉ.सुरेश गोसावी यांनी सांगितले. दरम्यान,राज्य शासनाच्या आदिवासी विभागाच्या प्रकल्पामध्ये मिळालेल्या निधीमध्ये कोट्यवधी रुपयांचा भ्रष्टाचार झाल्याचे कॅग अहवालात दिसून आले आहे. त्यामुळे डॉ. आदित्य अभ्यंकर यांच्या निलंबनाची मागणी करण्यात आली. मात्र, अभ्यंकर यांना सक्तीच्या रजेवर पाठवण्यात येणार असल्याचे कुलगुरू डॉ. गोसावी यांनी अधिसभेत सांगितले.

अधिसभेच्या मागील बैठकीत या प्रकरणी फॉरेन्सिक ऑडिट करण्याचे मान्य करण्यात आले होते. तसेच फॉरेन्सिक ऑडिटचा अहवाल सभागृहात सादर करण्याचे आश्वासन देण्यात आले होते.मात्र,विद्यापीठाच्या अधिसभेत फॉरेन्सिक ऑडिट अधिसभेत न ठेवल्याने सदस्यांनी कामकाज बंद ठेवले जाईल, असे स्पष्ट केले. त्यावर अधिसभेचे कामकाज १० मिनिटे तहकूब ठेवण्यात आले. त्यानंतर कुलगुरू यांनी डॉ.आदित्य अभ्यंकर यांना सक्तीच्या रजेवर पाठवले जाणार असल्याचे सांगितले. त्यानंतर सभागृहाचे कामकाज सुरू झाले.

अभ्यंकर यांना येत्या ३० मार्चपासून सक्तीच्या रजेवर पाठवले जाईल,असे कुलगुरू डॉ. सुरेश गोसावी यांनी सांगितले. मात्र, त्यांना आजपासूनच सक्तीच्या रजेवर पाठवा, अशी मागणी करण्यात आली. त्यावर २७ मार्च २०२६ रोजी सायंकाळी अभ्यंकर यांना सक्तीच्या रजेवर पाठवण्यात येणार असल्याचे कुलगुरू डॉ. गोसावी म्हणाले. फॉरेन्सिक ऑडिट एका महिन्यात करण्यात येणार असल्याचे कुलगुरू यांनी सांगितले.