‘नॅक’ बाबत विद्यापीठांचे तोंडावर बोट! देवळाणकरांनी मागवली संलग्नता काढलेल्या महाविद्यालयांची यादी
विद्यापीठांकडून अपेक्षित प्रतिसाद न मिळाल्याने उच्च शिक्षण संचालक डॉ. शैलेंद्र देवळाणकर यांनी पुन्हा सर्व विद्यापीठांना कार्यवाहीबाबतचा वस्तुनिष्ठ अहवाल पाठविण्यास सांगितले आहे.
eduvarta@gmail.com 
एज्युवार्ता न्यूज नेटवर्क
शैक्षणिक वर्ष २०२३-२४ च्या प्रथम वर्ष प्रवेशाच्या प्रारंभ दिनांकापर्यंत नॅक मूल्यांकन व पुनर्मूल्यांकन करण्याच्या सुचना उच्च शिक्षण विभागाने दिल्या होत्या. ज्या महाविद्यालयांचे मुल्यांकन झालेले नाही, अशा महाविद्यालयांबाबत संलग्नता काढून घेण्यासंदर्भात केलेल्या कार्यवाहीचा अहवाल विभागाने सर्व विद्यापीठांकडून मागविला होता. पण अजूनही काही विद्यापीठांनी अहवाल पाठविलेला नाही. तर काही विद्यापीठांनी केवळ कार्यवाही चालू आहे, असे कळविले आहे.
विद्यापीठांकडून अपेक्षित प्रतिसाद न मिळाल्याने उच्च शिक्षण संचालक डॉ. शैलेंद्र देवळाणकर यांनी पुन्हा सर्व विद्यापीठांना कार्यवाहीबाबतचा वस्तुनिष्ठ अहवाल दोन दिवसांत पाठविण्यास सांगितले आहे. संलग्नता काढून घेण्यात आलेल्या महाविद्यालयांची यादीच त्यांनी विद्यापीठांकडून मागवली आहे. विभागाकडून २३ मे व ९ ऑगस्ट रोजी सर्व विद्यापीठांना नॅक मुल्यांकनाबाबत कळविले होते. पण काही विद्यापीठाकडून अपेक्षित प्रतिसाद मिळालेला नाही.
NEP 2020 : शालेय शिक्षणात अंमलबजावणीसाठी १६ जणांची सुकाणू समिती
याबाबत देवळाणकर यांनी पुन्हा सर्व विद्यापीठांना पत्र पाठविले आहे. या पत्रामध्ये म्हटले आहे की, महाराष्ट्र सार्वजनिक विद्यापीठ अधिनियम २०१६ कलम ११० मधिल पोटकलम (४) मध्ये नमूद तरतूदी नुसार, आपल्या विद्यापीठाच्या परिक्षेत्रातील ज्या महाविद्यालयांनी शैक्षणिक वर्ष २०२३-२४ च्या प्रथम वर्ष प्रवेशाच्या प्रारंभ दिनांकापर्यंत नॅक मूल्यांकन व पुनर्मूल्यांकन केले नाही अशा महाविद्यालयांबाबत महाविद्यालयांची संलग्नता काढून घेण्यासंदर्भात विद्यापीठांनी महाविद्यालयांसंदर्भात उपरोक्त अधिनियमातील तरतुदीनुसार केलेल्या कार्यवाहीचा अहवाल सादर करण्याबाबत संचालनालयाने कळविले होते.
अद्यापही काही विद्यापीठांकडून कार्यवाहीचा अहवाल अप्राप्त आहे. तसेच ज्या विद्यापीठांनी अहवाल सादर केला आहे. त्यामधील काहींनी केवळ कार्यवाही चालू असून लवकरच अहवाल सादर करण्यात येईल, असे आश्वासन दिले आहे. याबाबत कार्यवाहीची वस्तुनिष्ठ माहिती नमूद करावी. महाविद्यालयांची संलग्नता काढून घेण्यासंदर्भात विद्यापीठांनी त्या महाविद्यालयांच्या नावाच्या यादीसह केलेली कार्यवाही नमूद करुन केलेल्या कार्यवाहीचा अहवाल संचालनालयास अपेक्षित आहे.
अद्यापही ज्या विद्यापीठांनी अशी यादी सादर केली नाही, त्या सर्व विद्यापीठांनी तसेच ज्या विद्यापीठांनी केवळ आश्वासन दिले आहे, अशाही विद्यापीठांनी व ज्यांनी अद्यापपर्यंत संचालनालयास अहवाल सादर केलेला नाही. त्या सर्व विद्यापीठांनी महाराष्ट्र सार्वजनिक विद्यापीठ अधिनियम २०१६ मधील नॅक संदर्भात नमूद केलेल्या तरतूदीनुसार कोणत्या महाविद्यालयांची संलग्नता काढून घेण्यात आली आहे, त्या महाविद्यालयांची यादी इ.बाबत त्वरीत अहवाल संचालनालयास inavi.dhepune@gov.in or mavi.dhepune@nic.in या मेलआयडीवर सादर करावा. ही माहिती दि. ७ सप्टेंबरपर्यंत पाठविण्यास सांगण्यात आले आहे.
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
