NCC च्या विद्यार्थ्यांना ट्रेनरकडून अमानुष मारहाण; सोशल मीडियात ठाण्यातील व्हिडीओ व्हायरल

एज्युवार्ता न्यूज नेटवर्क

ठाण्यातील (Thane) जोशी-बेडेकर महाविद्यालयामधील (Joshi Bedekar College) धक्कादायक घटना घडली आहे. महाविद्यालयातील राष्ट्रीय छात्र सेनेच्या (NCC) ९ ते १० विद्यार्थ्यांना पावसात काठीने मारहाण केल्याचा व्हिडीओ व्हायरल झाला आहे. मारहाण करणारा ट्रेनर (NCC Trainer) म्हणजेच वरिष्ठ विद्यार्थी असल्याचे समोर आले आहे. या धक्कादायक प्रकारामुळे विद्यार्थी व पालक हादरून गेले असून महाविद्यालयाने संबंधित विद्यार्थ्यावर कठोर कारवाई केल्याचे सांगितले जात आहे.

जोशी-बेडेकर महाविद्यालयाच्या आवारात बांदोडकर, बेडेकर आणि पॉलिटेक्निक या तिन्ही विभागांच्या विद्यार्थ्यांना एकत्रितपणे NCC चे प्रशिक्षण दिले जाते. हे प्रशिक्षण सुरू असताना सिनियर कॅडेट कॅप्टनने NCC च्या ९ ते १० विद्यार्थ्यांना भरपावसात काठीने फोडून काढल्याचे व्हिडीओमध्ये दिसत आहे. या विद्यार्थ्यांना पावसाच्या पाण्यात उभे केल्याचेही व्हिडीओमध्ये दिसते. मात्र, एवढी मारहाण का केली याबाबतचे कारण समोर आलेले नाही.

सिम्बायोसिसच्या प्राध्यापकांविरोधात 'अभाविप'चे आंदोलन; धार्मिक भावना दुखावल्याचा आरोप

विद्यार्थ्यांना अमानुष मारहाण होत असल्याचा व्हिडीओ व्हायरल झाल्यानंतर सर्वत्र संताप व्यक्त केला जात आहे. महाविद्यालयातही दहशत पसरल्याचे सांगितले जात असून विद्यार्थ्यांकडून एनसीसीमध्ये जाण्यास नकार दिला जात असल्याचेही समजते. दरम्यान, हा व्हिडीओ नेमका कधीचा आहे, याबाबत खात्रीशीर माहिती समोर आलेली नाही. आमदार रोहित पवार यांनीही हा व्हिडीओ ट्विट करत कडक कारवाईची मागणी केली आहे.

महाविद्यालयाच्या प्राचार्या म्हणतात...

महाविद्यालयाच्या प्राचार्या सुचित्रा नाईक यांनीही हा व्हिडीओ समोर आल्यानंतर संताप व्यक्त केला. त्या म्हणाल्या, मारहाण करणारा एनसीसीमधील विद्यार्थीच आहे. प्राध्यापक असे करत नाहीत. ते असताना असा प्रकारही होत नाही. हा अत्यंत घृणास्पद आणि विकृत मानसिकतेतून केलेला प्रकार आहे. संबंधित विद्यार्थ्यावर लगेचच कारवाईची प्रक्रिया सुरू केली आहे. त्याचबरोबर असे प्रकार यापुढे होऊन नयेत म्हणून एक कमिटीची स्थापनाही तत्काळ करत आहोत.

 शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.

https://chat.whatsapp.com/Ib9LP2jUnnXAQpcKKJ5nWD