जात वैधता प्रमाणपत्रातील त्रुटीची वेळेत पूर्तता करा; बार्टीचे विद्यार्थ्यांना आवाहन 

शैक्षणिक वर्ष २०२६-२७ मध्ये व्यावसायिक अभ्यासक्रमांना प्रवेश घेतलेल्या आणि जातवैधता प्रमाणपत्राची प्रक्रिया अद्याप प्रलंबित असलेल्या विद्यार्थ्यांनी अर्जातील त्रुटींची ऑनलाइन पूर्तता करावी, असे आवाहन डॉ. बाबासाहेब आंबेडकर संशोधन व प्रशिक्षण संस्था (बार्टी) यांनी केले आहे.

जात वैधता प्रमाणपत्रातील त्रुटीची वेळेत पूर्तता करा; बार्टीचे विद्यार्थ्यांना आवाहन 

एज्युवार्ता न्यूज नेटवर्क

शैक्षणिक वर्ष २०२६-२७ मध्ये व्यावसायिक अभ्यासक्रमांना प्रवेश घेतलेल्या आणि जातवैधता प्रमाणपत्राची प्रक्रिया अद्याप प्रलंबित असलेल्या विद्यार्थ्यांनी अर्जातील त्रुटींची ऑनलाइन पूर्तता करावी, असे आवाहन डॉ. बाबासाहेब आंबेडकर संशोधन व प्रशिक्षण संस्था (बार्टी) यांनी केले आहे. राज्य सामाईक प्रवेश परीक्षा कक्षामार्फत उच्च शिक्षण, तंत्रशिक्षण, कृषी शिक्षण, वैद्यकीय व आयुष शिक्षण तसेच कला शिक्षण विभागांतील विविध पदवी आणि पदव्युत्तर व्यावसायिक अभ्यासक्रमांसाठी केंद्रीय प्रवेश प्रक्रिया राबविण्यात येत आहे. या प्रक्रियेत राखीव प्रवर्गातून प्रवेश निश्चित झालेल्या अनेक विद्यार्थ्यांचे जातवैधता प्रमाणपत्र अद्याप निर्णय प्रक्रियेत असून संबंधित समित्यांनी एसएमएस, ई-मेल आणि पत्राद्वारे कळवूनही अनेक विद्यार्थ्यांनी त्रुटी पूर्ततेसाठी संपर्क साधलेला नाही.

बार्टीने स्पष्ट केले आहे की त्रुटी पूर्तता करण्याची सर्वस्वी जबाबदारी अर्जदारांची आहे. जातवैधता प्रमाणपत्राअभावी कोणताही विद्यार्थी व्यावसायिक अभ्यासक्रमाच्या प्रवेशापासून वंचित राहू नये, यासाठी अर्जदारांनी आपल्या लॉग-इनवरून ऑनलाईन त्रुटी पूर्तता करावी. यामुळे प्रवेश प्रक्रिया सुरळीत होण्यास मदत होईल आणि विद्यार्थ्यांचे भविष्य सुरक्षित राहील. संस्थेने याबाबत नागरिक-केंद्रित सेवा उपलब्ध करून देण्यावर भर दिला आहे.

अधिक माहिती व मदतीसाठी विद्यार्थ्यांना https://www.cvc.barti.in/ या नवीन पोर्टलवर ‘बार्टी हेल्पडेस्क’ची सुविधा उपलब्ध करून देण्यात आली आहे. या पोर्टलद्वारे विद्यार्थी सहजपणे त्रुटी पूर्तता करू शकतात आणि आवश्यक मार्गदर्शन मिळवू शकतात. शंका निरसनासाठी ०२०-२६३३३३३९ या दूरध्वनी क्रमांकावर, ९४०४९९९४५२ या व्हॉट्सॲप क्रमांकावर (केवळ मेसेजसाठी) किंवा helpdesk@barti.in या ई-मेलवर संपर्क साधता येईल.

बार्टीच्या महासंचालक तथा जिल्हा जात प्रमाणपत्र पडताळणी समित्यांच्या मुख्य समन्वयक दीपा मुधोळ-मुंडे यांनी विद्यार्थ्यांना या सुधारित सेवांचा लाभ घेण्याचे आवाहन केले आहे. त्यांनी सांगितले की, वेळेवर त्रुटी पूर्तता केल्यास प्रवेश प्रक्रिया विनाअडथळा पूर्ण होईल. सर्व संबंधित विद्यार्थ्यांनी तातडीने या सुविधांचा उपयोग करून आपली प्रक्रिया पूर्ण करावी, असे आवाहन त्यांनी केले आहे.