कुलगुरू हटाव, विद्यापीठ बचाव मागणीसाठी; विविध विद्यार्थी संघटनांचे आंदोलन, अधिसभेत गोंधळाची शक्यता
युवा सेना, सम्यक विद्यार्थी आंदोलन, आझाद समाज पार्टी, डप्सा, छात्र भारती, युवक काँग्रेस, नॅशनल स्टुडंट्स युनियन ऑफ इंडिया, स्टुडन्ट हेल्पिंग हँड्स, विद्यापीठ विद्यार्थी संघर्ष कृती समिती आदी विद्यार्थी संघटनांनी विद्यापीठाच्या मुख्य इमारतीजवळ आंदोलन करण्याचा इशारा दिला आहे.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठात अडीच वर्षानंतर कुलसचिव यांची नियुक्ती, राष्ट्रीय उच्च दरी शिक्षा अभियानाचा अखर्चित ६१ कोटींचा निधी, पाच लाखाहून अधिक विद्यार्थ्याचे लांबलेले निकाल, विद्यापीठाच्या कारभारावर झालेले भ्रष्टाचाराचे आरोप यांसह विविध कारणांमुळे विद्यापीठाचे कुलगुरू डॉ. सुरेश गोसावी यांनी राजीनामा द्याव, अशी मागणीसाठी विविध विद्यार्थी संघटनांनी शुक्रवारी (दि.२७) अधिसभेच्या पहिल्या दिवशी सकाळी 10 वाजता आंदोलन करण्याचा इशारा दिला आहे. त्यामुळे विद्यापीठाची अधिसभा वादळी होण्याची शक्यता वर्तवली जात आहे.
युवा सेना, सम्यक विद्यार्थी आंदोलन, आझाद समाज पार्टी, डप्सा, छात्र भारती, युवक काँग्रेस, नॅशनल स्टुडंट्स युनियन ऑफ इंडिया, स्टुडन्ट हेल्पिंग हँड्स, विद्यापीठ विद्यार्थी संघर्ष कृती समिती आदी विद्यार्थी संघटनांनी विद्यापीठाच्या मुख्य इमारतीजवळ आंदोलन करण्याचा इशारा दिला आहे.
अडीच वर्षांनंतर वादग्रस्त व्यक्तीची कुलसचिव पदी केलेली नियुक्ती तात्काळ रद्द करावी. कुलसचिव निवड प्रक्रिये दरम्यान गंभीर स्वरूपाचे आरोप झाल्यानंतर गठीत करण्यात आलेल्या सत्यशोधन समितीचा अहवाल जाहीर करावा, 90 दिवसानंतरही विद्यार्थ्यांचे प्रलंबित ठेवलेले निकाल जाहीर करावेत. कमवा व शिका योजनेच्या विद्यार्थ्यांच्या मानधनात वाढ करावी. प्लेसमेंट सेलच्या माध्यमातून विद्यार्थ्यांना रोजगाराच्या संधी उपलब्ध करून द्याव्यात, प्रभारी परीक्षा संचालकांना हटवून पूर्णवेळ परीक्षा संचालकांची नियुक्ती करावी. एक्स्ट्रा क्रेडिट कोर्सच्या नावावर होणारे विद्यार्थ्यांची लूट थांबवावी. मराठी भाषा भावनाचे बांधकाम तात्काळ पूर्ण करून मराठी भाषा भवन सुरू करावे, आदी मागण्यांसाठी विद्यार्थी संघटनांतर्फे विद्यापीठावर धडक मोर्चा काढला जाणार आहे.
दरम्यान, विद्यापीठात प्राध्यापक भरती प्रक्रिया रखडली असून पूर्णवेळ अधिष्ठाता नसल्यामुळे अनेक अडचणी निर्माण झाल्या आहेत. त्यातच प्रभारी कुलसचिव प्रभारी परीक्षा नियंत्रक अशा मुख्य पदांवर पूर्ण वेळ व्यक्ती नसल्यामुळे महत्त्वपूर्ण निर्णय घेणे अडचणीचे झाले आहे. सावित्रीबाई फुले पुणे विद्यापीठाचे एनआयआरएफ रँकिंग मोठ्या प्रमाणावर घसरले असून पुढील वर्षी त्यात आणखी घसरण होण्याची शक्यता वर्तवली जात आहे. त्यातच विद्यापीठाशी संबंधित अनेक प्रश्न प्रलंबित असल्यामुळे अधिसभा सदस्य आक्रमक भूमिकेत आहेत. परिणामी विद्यापीठाचे अधिसभा अत्यंत वादळी होण्याची शक्यता वर्तवली जात आहे.
