नागपुरातील 12 शाळांना बॉम्बने उडवून देण्याची धमकी; पोलिस दलात मोठी खळबळ 

एज्युवार्ता न्यूज नेटवर्क 

नागपूरमध्ये आज मंगळवार १८ ऑगस्ट  (Nagpur 18 August) रोजी नामांकित १२ शाळांच्या अधिकृत ईमेल आयडीवर बॉम्बने उडवून देण्याची धमकी (12 schools Bomb threat) देण्यात आली. या धमकीमुळे शहर पोलीस दलात खळबळ उडाली आहे. संबंधित मुख्याध्यापकांनी मेल वाचल्यानंतर ताबडतोब पोलिसांना कळवले. धमकीच्या मेलमध्ये शाळांवर राष्ट्रीय स्वयंसेवक संघाचे (RSS) विचार मुलांवर लादत असल्याचा आरोप करण्यात आला होता. त्यामुळे संपूर्ण शाळा बॉम्बने उडवून देण्याची भाषा वापरली गेली होती. या शाळांमध्ये भांडेवाडीतील सेंटर पॉइंट,(Bhandewadi Centre Point) अजनी, काटोल आणि वायुसेना नगर परिसरातील संस्थांचा समावेश आहे. जिल्हा न्यायालयाचाही (District Court) उल्लेख करण्यात आला होता.

धमकी मिळताच संबंधित पोलीस ठाण्यांना अलर्ट जारी करण्यात आला. शाळांजवळ पोलिसांच्या पथकांनी त्वरित दाखल होऊन परिसर रिकामा केला. बॉम्ब शोधक व नाशक पथक सर्व शाळांमध्ये पोहोचले आणि तपासणी सुरू केली. प्रशासनाने श्वान पथकालाही पाचारण केले. शाळा परिसरात अचानक पोलिसांची मोठी तैनाती झाल्याने पालकांमध्ये भीतीचे वातावरण पसरले आहे. काही पालकांनी माहिती मिळताच शाळेकडे धाव घेतली. मात्र परिसरात कोणताही गोंधळ होऊ नये यासाठी पोलिसांनी कडक बंदोबस्त केला आहे.

नागपूरचे सह पोलीस आयुक्त नवीनचंद्र रेड्डी यांनी माहिती मिळाल्यानंतर संबंधित अधिकाऱ्यांना सतर्क केले. तपासणीदरम्यान शाळांमध्ये बॉम्बसदृश कोणतीही वस्तू आढळली नाही, अशी माहिती अधिकाऱ्यांनी दिली. खालिस्तानी संस्थेच्या नावाने हे मेल पाठवले गेल्याचे दिसून आले. खासगी आणि काही सरकारी शाळांनाही ही धमकी मिळाली होती. पोलिसांनी सर्व शाळांची सविस्तर तपासणी केल्यानंतर परिसर सुरक्षित असल्याचे जाहीर केले.

या घटनेमुळे पालकांमध्ये चिंता निर्माण झाली असली तरी प्रशासनाने तातडीने दखल घेतल्याने परिस्थिती नियंत्रणात आली. पोलिसांनी धमकीच्या ईमेलचा सखोल तपास सुरू केला असून दोषींविरुद्ध कारवाईची प्रक्रिया सुरू झाली आहे. शाळा सुरक्षित असल्याचे आश्वासन देण्यात आले असून पालकांना शांत राहण्याचे आवाहन करण्यात आले आहे. नागपूर शहर पोलिसांनी या प्रकरणात सतर्कतेने काम केले.