कोल्हापूर टीईटी पेपर फुटी प्रकरणाशी परीक्षा परिषदेचा संबंध नाही; आयुक्तांचा खुलासा 

एज्युवार्ता न्यूज नेटवर्क 

महाराष्ट्र राज्य परीक्षा परिषदेच्या माध्यमातून 23 नोव्हेंबर रोजी राज्यातील विविध परीक्षा केंद्रांवर घेण्यात आलेल्या टीईटी परीक्षेमध्ये (tet exam) अत्यंत गोपनीयता पाळण्यात आली. प्रश्नपत्रिकेच्या छपाईपासून ते प्रश्नपत्रिका परीक्षा केंद्रात परीक्षा देणाऱ्या उमेदवारांच्या हातामध्ये पडेपर्यंत कुठेही गोपनीयतेचा भंग झाला असल्याच्या तक्रारी प्राप्त झाल्या नाहीत अथवा तसे आढळून आले नाही. त्यामुळे कोल्हापूर येथील टीईटी परीक्षेसंदर्भात उघडकीस आलेल्या पेपर फुटीच्या (Paper leak)घटनेचा राज्य परीक्षा परिषदेशी कोणताही संबंध नाही, असा खुलासा राज्य परीक्षा परिषदेच्या आयुक्त अनुराधा ओक यांनी प्रसिद्धी पत्रकाद्वारे केला आहे.

महाराष्ट्र शिक्षक पात्रता परीक्षा (MAHATET) २०२५ चे आयोजन राज्यातील ३७ जिल्हास्तरावर जिल्हा मुख्यालयाच्या ठिकाणी एकूण १४२३ केंद्र निश्चित केले होते.एकूण ३७ जिल्ह्याच्या मुख्यालय ठिकाणी १४२३ केंद्रांवर महाराष्ट्र शिक्षक पात्रता परीक्षा (MAHATET) - २०२५ परीक्षा अयोजित केल्याप्रमाणे परीक्षा विहित वेळेत पार पडली आहे. या परीक्षेचे नियंत्रण राज्य नियंत्रक कक्ष, जिल्हा नियंत्रण कक्ष, जिल्हा आयोजन व सनियंत्रण समिती कक्षाकडून अतिशय काटेकोरपणे करण्यात आले होते. मात्र, टीईटी पेपर फोडण्याच्या तयारीत असणाऱ्या टोळीला पोलिसांकडून जेरबंद करण्यात आल्याची माहिती उघडकीस आली. त्यावर परीक्षा परिषदेतर्फे खुलासा करण्यात आला आहे.

 महाराष्ट्र राज्य परीक्षा परिषदेत गोपनीयरित्या प्रश्नसंच तयार करून तज्ञांमार्फत स्वतंत्र पाकिटात सीलबंद केल्या जातात. तयार केलेल्या संचापैकी एक प्रश्नसंच निवडून गोपनीय प्रेसकडे दिला जातो. गोपनीय प्रेसमार्फत प्रश्नपत्रिका छापून वर्गखोली नुसार पाकिटे तयार करून केंद्रनिहाय बॉक्समध्ये सिलबंद पॅकिंग केले जाते. या बॉक्सेस सिलबंद गाड्यांमार्फत जिल्हा कस्टडीमध्ये पाठविले जातात. जिल्ह्यांच्या ठिकाणी प्रश्नपत्रिकांची कस्टडी ही शक्यतो जिल्हा कोषागार कार्यालय ही असते. तसेच सी.सी.टी.व्ही. व हत्यारबंद पोलिस बंदोबस्त असलेल्या ठिकाणी असते. गोपनीय प्रेसकडून आलेल्या प्रश्नपत्रिकांचे बॉक्स हे सिलबंद गाडीतून आले आहेत का ? बॉक्सेस व्यवस्थित सिलबंद आहेत का? याची खातरजमा करूनच जिल्हा परिरक्षक व शिक्षणाधिकारी (प्राथमिक) यांच्या उपस्थितीत, कस्टडीमध्ये सदर साहित्य घेतले जाते.

परीक्षेच्या दिवशी जिल्हा परिरक्षक व शिक्षणाधिकारी (प्राथमिक) यांच्या उपस्थितीत व्हिडीओ रेकॉर्डिंग (चित्रिकरण) करूनच झोनल ऑफिसरकडे केंद्रनिहाय प्रश्न पत्रिकाचे बॉक्स दिले जातात.झोनल ऑफिसर कस्टडी ते केंद्रावर सदर बॉक्सेस पोहोच करतांना या प्रवासाचेही व्हिडीओ रेकॉडींग (चित्रिकरण) केले जाते. केंद्रावर सदर बॉक्सेस मधून प्रश्नपत्रिकांची ब्लॉक निहाय पाकिटे काढून, ब्लॉक मध्ये सिलबंद पाकिटे वाटली जातात. उमेदवारांच्या/परीक्षार्थीच्या समोर सदर पाकिटे उघडले जाते. याच पद्धतीने या परीक्षेच्यावेळी ही कार्यवाही झालेली आहे.

राज्यभरातून कोणत्याही ठिकाणाहून प्रश्नपत्रिकांची गाडी सिलबंद स्वरूपात आली नाही, अथवा गोपनीय प्रश्नपत्रिकांचे बॉक्सेस अथवा पाकिटे सिलबंद स्वरूपात प्राप्त झाले नाहीत, अशी तक्रार प्राप्त नाही. अथवा असे निदर्शनासही आले नाही. म्हणजेच गोपनीय प्रेस ते केंद्र हा प्रश्नपत्रिकांचा प्रवास अत्यंत काटेकोरपणे झालेला दिसून येत आहे. या कोल्हापूर प्रकरणाच्या पार्श्वभूमीवर महाराष्ट्र राज्य परीक्षा परिषदेचे कामकाज उपरोक्त नमूद कार्यपद्धतीनुसार झाल्याने महाराष्ट्र राज्य परीक्षा परिषदेचा या प्रकरणी संबंध नाही, असे अनुराधा ओक यांनी स्पष्ट केले आहे.