शालार्थ आयडी बाबत महत्त्वाची अपडेट! शिक्षण विभागाने जाहीर केल्या मार्गदर्शक सूचना 

एज्युवार्ता न्यूज नेटवर्क 

राज्यात पवित्र प्रणालीमार्फत (Pavirta Portal Pranali) नियुक्त कर्मचाऱ्यांना शालार्थ आयडी (Shalarth ID) देण्यासाठी संबंधित शाळेच्या शालार्थ प्रणालीवर पदे नमूद नसल्यास संचमान्यतेनुसार (Sanch Manyata) पदे निर्माण करून शालार्थ आयडी देण्यात यावे. तर, अध्यापक विद्यालयांना यूडायस क्रमांक नसल्याने पवित्र प्रणालीमार्फत नव्याने रुजू झालेल्या शिक्षकांना प्रचलित कार्यपद्धतीनुसार विभागीय अध्यक्षांनी ऑफलाइन पद्धतीने शालार्थ आयडी देण्याच्या सूचना देण्यात आल्या आहेत. माध्यमिक व उच्च माध्यमिक शिक्षण संचालक डॉ. महेश पालकर (Director Dr. Mahesh Palkar) यांनी या संदर्भात राज्यातील विभागीय शिक्षण उपसंचालक, शिक्षणाधिकारी, शिक्षण निरीक्षक, प्रशासन अधिकारी, वेतन पथकांना मार्गदर्शक सूचना (Education Department Guidelines) दिल्या आहेत. 

शिक्षण विभागाकडून शासकीय, अनुदानित शाळांमधील शिक्षक आणि कर्मचाऱ्यांना वेतनासाठी दिल्या जाणाऱ्या विशिष्ट ओळख क्रमांकाला शालार्थ आयडी म्हटले जाते. शिक्षक, कर्मचाऱ्यांच्या बदली, स्थलांतर, राजीनामा अशा कारणांच्या अनुषंगाने तांत्रिक अडचणी उद्भवतात. या पार्श्वभूमीवर, शिक्षक, शिक्षकेतर कर्मचाऱ्यांच्या शालार्थ संकेतस्थळावरील सेवा समाप्त करणे, शालार्थ आयडीचे नियमन करणे, स्थलांतर झाल्यास बदल करण्याबाबतच्या सूचनांचा त्यात समावेश आहे.

कर्मचाऱ्याने ज्या शाळेतून राजीनामा दिला आहे, त्या शाळेच्या विभागातील विभागीय शिक्षण उपसंचालक यांनी संबंधित कर्मचारी संबंधित विभागात किंवा इतर विभागात रुजू झाल्यास शालार्थ प्रणालीवरील सुविधा वापरून त्याचा शालार्थ आयडी पुनरुज्जीवित करावा. त्यानंतर ज्या - शाळेतून राजीनामा देण्यात आलेला आहे त्या शाळेसंबंधित वेतन पथक अथवा गटशिक्षणाधिकारी यांनी संबंधित कर्मचाऱ्यास विलग करून कर्मचारी ज्या शाळेत नव्याने रुजू झालेल्या शाळेसंबंधित वेतन पथक अथवा गटशिक्षणाधिकारी यांनी या कर्मचाऱ्याला संलग्न 1 करण्याची कार्यवाही करावी. आधीचा शालार्थ असल्याने नव्याने शालार्थ आयडी तयार करू नये, असे नमूद करण्यात आले आहे.

एखादी शाळा स्थलांतरित होऊन अन्य जिल्ह्यात गेल्यास त्या विभागातील विभागीय शिक्षण उपसंचालकांनी शाळेचा पूर्वीचा यूडायस क्रमांक वापरून शाळा त्यांच्या विभागात स्थलांतरित झालेल्या ठिकाणी प्रणालीवरील सुविधेचा उपयोग करून पुनरुज्जीवित करून स्थलांतरित ठिकाणी हस्तांतरित करावा. त्यानंतर संबंधित वेतन पथक किंवा गटशिक्षणाधिकारी यांनी शाळेच्या स्थलांतरित ठिकाणी शालार्थ प्रणालीवर नोंदणी करून घ्यावी किंवा ज्या ठिकाणी शाळा स्थलांतरित झाली त्या विभागीय शिक्षण उपसंचालकांनी नवीन यूडायस क्रमांकाच्या आधारे शाळेचा समावेश शालार्थ प्रणालीवर करून घ्यावा, असे स्पष्ट करण्यात आले आहे.