सेट परीक्षेची तारीख जाहीर; 2 जून पासून अर्ज करता येणार
(सेट परीक्षा) येत्या 26 जुलै 2026 रोजी आयोजित केली जाणार आहे. उमेदवारांना येत्या २ जून पासून 16 जून पर्यंत नियमित शुल्कासह परीक्षा अर्ज भरण्यासाठी उपलब्ध करून दिले जाणार आहेत.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या सेट विभागातर्फे महाराष्ट्र व गोवा राज्यातील उमेदवारांसाठी घेतली जाणारी सहाय्यक प्राध्यापक पदासाठीची राज्यस्तरीय पात्रता परीक्षा (सेट परीक्षा) येत्या 26 जुलै 2026 रोजी आयोजित केली जाणार आहे. उमेदवारांना येत्या २ जून पासून 16 जून पर्यंत नियमित शुल्कासह परीक्षा अर्ज भरण्यासाठी उपलब्ध करून दिले जाणार आहेत, असे विद्यापीठाचे प्रभारी कुलसचिव डॉ. प्रफुल्ल पवार यांनी परिपत्रकाद्वारे स्पष्ट केले आहे.
सावित्रीबाई फुले पुणे विद्यापीठातर्फे दरवर्षी सेट परीक्षा आयोजित केली जाते. अनेक विद्यार्थी सेट परीक्षा केव्हा आयोजित केली जाणार याकडे डोळे लाऊन होते. अखेर विद्यापीठाने अधिकृतपणे या संदर्भातील पत्रक प्रसिद्ध केले आहे. येत्या 26 जुलै रोजी राज्यातील पुणे मुंबई कोल्हापूर, सोलापूर, अहिल्यानगर, नाशिक, धुळे, जळगाव, छत्रपती संभाजी नगर, नांदेड, अमरावती, नागपूर, चंद्रपूर, गडचिरोली, रत्नागिरी, परभणी, नंदुरबार व गोवा राज्यातील पणजी या शहरांमधील परीक्षा केंद्रांवर परीक्षा आयोजित केली जाणार आहे. 17 जून पासून विलंब शुल्क सुरू होणार आहे. विद्यार्थी 19 जून पर्यंत विलंब शुल्कासह अर्ज भरू शकतात.
विद्यार्थ्यांनी ऑनलाइन भरलेला अर्ज विद्यापीठाकडे पाठवू नये, अर्जाची छापील प्रत स्वतःकडे जतन करून ठेवावी. सेट परीक्षेसाठी खुल्या संवर्गातील विद्यार्थ्यांना 800 रुपये नियमित शुल्क असून 1300 रुपये विलंब शुल्क आहे. तर आरक्षित संवर्गातील विद्यार्थ्यांना नियमित शुल्क 650 एवढे असून विलंब शुल्क 1 हजार 150 एवढे आहे.
सेट परीक्षेचे शुल्क भरलेल्या विद्यार्थ्यांची यादी सेट विभागाच्या संकेतस्थळावर सर्वसाधारणपणे जुलै महिन्याच्या दुसऱ्या आठवड्यात प्रसिद्ध केली जाईल. परीक्षा शुल्क भरूनही ज्या विद्यार्थ्यांचे नाव यादीत समाविष्ट नसेल अशा विद्यार्थ्यांनी शुल्क अदा केल्याचा पुरावा सेट विभागाकडे ईमेलद्वारे पाठवावा.
जर विद्यार्थी एखाद्या विषयात आधीच सेट परीक्षा उत्तीर्ण असेल तर त्याला परत त्याच विषयात सेट परीक्षा देता येणार नाही, असेही प्रभारी कुलसचिव प्रफुल्ल पवार यांनी स्पष्ट केले आहे.
