विना अनुदानित कॉलेजला सापत्निक वागणूक का? CHB प्राध्यापक आणि कंत्राटी भरतीला परवानगी का नाही...

एज्युवार्ता न्यूज नेटवर्क 

राज्य शासन आणि सावित्रीबाई फुले पुणे विद्यापीठात कंत्राटी पद्धतीने कर्मचारी भरती केली जाते. तसेच अनुदानित महाविद्यालयात CHB तत्वावर प्राध्यापक भरतीसाठी मान्यता दिली जाते. त्याच पद्धतीने विना अनुदानित महाविद्यालयांना कंत्राटी पद्धतीने आणि CHB तत्वावर प्राध्यापक भरतीसाठी परवानगी का दिली जात नाही, असा सवाल विद्यापीठाच्या विद्या परिषदेचे सदस्य डॉ. सुधाकर जाधवर यांनी शनिवारी विद्यापीठाच्या विद्या परिषदेच्या बैठकीत उपस्थित केला.

विद्यापीठाचे कुलगुरू डॉ. सुरेश गोसावी यांच्या अध्यक्षतेखाली शनिवारी विद्या परिषदेची बैठक पार पडली. त्यात विविध शैक्षणिक विषयावर चर्चा करण्यात आली. यावेळी जाधवर यांनी विना अनुदानित महाविद्यालयांच्या प्रश्नाकडे लक्ष वेधले. तसेच प्राध्यापक भरतीला विलंब होत असल्याने शासन निर्णयानुसार कंत्राटी पद्धतीने भरती करण्यास परवानगी मिळाल्यास संस्था चालवणे सोईचे होईल, असेही त्यांनी सांगितले.

राज्य शासनाने सर्वच क्षेत्रात कंत्राटी भरती करण्याबाबत वेळोवेळी अध्यादेश प्रसिद्ध केले आहेत. तसेच विद्यापीठातर्फे कंत्राटी पद्धतीने कर्मचारी व प्राध्यापक भरती केली जात आहे. त्यामुळे विना अनुदानित संस्थांना या पद्धतीने भरती करण्यास आणि या पदांना मान्यता का दिली जात नाही, असा सवाल डॉ. सुधाकर जाधवर यांनी उपस्थित केला.

विद्यापीठातर्फे १३३ कंत्राटी प्राध्यापकांची भरती केली जाणार आहे. त्यानुसार विना अनुदानित संस्थांना सुद्धा कंत्राटी पद्धतीने कर्मचारी व प्राध्यापक नियुक्त करण्यास परवानगी देण्यात यावी, असेही जाधवर म्हणाले.