सेट परीक्षेची तारीख पुन्हा बदलणार? अर्ज भरण्यास दिली मुदतवाढ
एमपीएससीच्या परीक्षेमुळे 26 जुलै रोजी घेतली जाणारी परीक्षा पुढे ढकलण्यात आली असून ही परीक्षा 6 सप्टेंबर रोजी घेण्याची संभाव्य तारीख प्रसिद्ध करण्यात आली आहे. मात्र, त्याच दिवशी सीटीईटी परीक्षा असल्याने सेट परीक्षेच्या तारखेत पुन्हा बदल घेण्याची शक्यता आहे.
eduvarta@gmail.com 
सावित्रीबाई फुले पुणे विद्यापीठाच्या सेट परीक्षा विभागाने महाराष्ट्र व गोवा राज्यातील ४१ व्या राज्य पात्रता (SET) परीक्षेसाठी विलंब शुल्कासह परीक्षा अर्ज भरण्याची मुदत पुन्हा वाढविली आहे. आता उमेदवारांना १३ जुलै ते २३ जुलै २०२६ या कालावधीत अर्ज भरता येणार असून, अर्जातील त्रुटी दुरुस्त करण्यासाठी २४ ते २६ जुलै २०२६ हा स्वतंत्र कालावधी देण्यात आला आहे.एमपीएससीच्या परीक्षेमुळे 26 जुलै रोजी घेतली जाणारी परीक्षा पुढे ढकलण्यात आली असून ही परीक्षा 6 सप्टेंबर रोजी घेण्याची संभाव्य तारीख प्रसिद्ध करण्यात आली आहे. मात्र, त्याच दिवशी सीटीईटी परीक्षा असल्याने सेट परीक्षेच्या तारखेत पुन्हा बदल घेण्याची शक्यता आहे.
सावित्रीबाई फुले पुणे विद्यापीठाचा सेट परीक्षा विभाग हा महाराष्ट्र शासनाची नोडल एजन्सी असून, विद्यापीठ अनुदान आयोगाच्या (UGC) मार्गदर्शक तत्त्वांनुसार महाराष्ट्र व गोवा राज्यातील विद्यापीठे आणि वरिष्ठ महाविद्यालयांमध्ये सहायक प्राध्यापक पदासाठी आवश्यक असलेली राज्य पात्रता (SET) परीक्षा आयोजित करण्यासाठी अधिकृत विभाग आहे.
यंदाची ४१ वी SET परीक्षा ६ सप्टेंबर २०२६ रोजी आयोजित करण्यात येणार असल्याचे विद्यापीठाने पत्रक प्रसिद्ध केले आहे. तसेच उमेदवारांची विलंब शुल्कासह अर्ज भरण्याची अंतिम मुदत ७ जुलै २०२६ रोजी संपली होती. मात्र, राज्यातील अनेक भागांत झालेल्या अतिवृष्टीमुळे इंटरनेट सेवा विस्कळीत झाल्याने अनेक विद्यार्थ्यांना ऑनलाईन अर्ज भरता आले नसल्याच्या तक्रारी ई-मेलद्वारे सेट विभागाकडे प्राप्त झाल्या आहेत.
या पार्श्वभूमीवर कोणताही पात्र विद्यार्थी अर्ज भरण्यापासून वंचित राहू नये, यासाठी विलंब शुल्कासह अर्ज भरण्याची मुदत १३ ते २३ जुलै २०२६ पर्यंत वाढविण्याचा निर्णय घेण्यात आला आहे. तसेच अर्ज भरताना झालेल्या चुका दुरुस्त करण्यासाठी उमेदवारांना २४ ते २६ जुलै २०२६ या कालावधीत ऑनलाईन सुधारणा करण्याची संधी उपलब्ध करून देण्यात आली आहे.
सेट परीक्षा विभागाने पात्र उमेदवारांनी वाढीव मुदतीचा लाभ घेऊन वेळेत अर्ज सादर करावेत, तसेच अर्जातील सर्व माहिती काळजीपूर्वक तपासून अंतिम सादर करावी, असे आवाहन केले आहे.
दरम्यान सीटीईटी परीक्षा ६ सप्टेंबर २०२६ होणार असल्याने विद्यापीठाने सेट परीक्षेच्या तारखेत बदल करावा, अशी मागणी विद्यार्थ्यांकडून केली जात आहे.
