देशाच्या शिक्षणाची सूत्रे मराठी व्यक्तीच्या हाती, पुण्याशी संबंधित प्रशांत लोखंडे CBSE च्या चेअरमन पदी

एज्युवार्ता न्यूज नेटवर्क

केंद्रीय माध्यमिक शिक्षण मंडळाचे (CBSE) नेतृत्व आता मराठी व्यक्ती करणार आहे. केंद्र सरकारने वरिष्ठ आयएएस अधिकारी प्रशांत सीताराम लोखंडे (IAS Officer Prashant Lokhande) यांच्याकडे सीबीएसईच्या चेअरपर्सन पदाची (CBSE Chairperson) अतिरिक्त जबाबदारी सोपवली आहेत. सध्या केंद्रीय गृह मंत्रालयात अतिरिक्त सचिव म्हणून कार्यरत असलेल्या लोखंडे यांनी देशातील सर्वात मोठ्या शालेय शिक्षण मंडळाचा (School Education Board) कारभार सांभाळण्याची महत्त्वाची जबाबदारी स्वीकारली आहे. केंद्रीय मंत्रिमंडळाच्या नियुक्ती समितीच्या निर्णयानुसार ही नियुक्ती करण्यात आली असून, ते पूर्णवेळ चेअरपर्सन म्हणून काम पाहतील तोपर्यंत ही अतिरिक्त जबाबदारी सांभाळतील. राहुल सिंह यांची जागा घेत लोखंडे यांची नियुक्ती करण्यात आली आहे.

प्रशांत लोखंडे यांचा पुण्याशी घनिष्ठ संबंध आहे. शिक्षणाचे माहेरघर मानल्या जाणाऱ्या पुण्यातून त्यांनी शिक्षण पूर्ण केले आहे. लोखंडे २००१ च्या AGMUT कॅडरच्या बॅचचे  अनुभवी आयएएस अधिकारी आहेत. प्रशासकीय सेवेत येण्यापूर्वी त्यांनी पुणे विद्यापीठातून मेकॅनिकल इंजिनिअरिंगची पदवी प्राप्त केली. त्यानंतर मुंबईतील प्रतिष्ठित नॅशनल इन्स्टिट्यूट ऑफ इंडस्ट्रियल इंजिनिअरिंग (NITIE) येथून इंडस्ट्रियल इंजिनिअरिंगमध्ये पोस्ट ग्रॅज्युएट डिप्लोमा पूर्ण केला. तंत्रज्ञान क्षेत्रातील मजबूत पार्श्वभूमी असलेल्या लोखंडे यांनी देशसेवेचा मार्ग निवडत आयएएस बनण्याचा निर्णय घेतला आणि आपल्या कार्यकुशलतेने वेगवेगळ्या जबाबदाऱ्या यशस्वीरित्या सांभाळल्या आहेत.

सीबीएसई बोर्डाशी संलग्न भारतातील आणि परदेशातील मिळून ३० हजारांहून अधिक शाळांचे नियंत्रण आता लोखंडे यांच्या हाती आहे. दरवर्षी कोट्यवधी विद्यार्थ्यांच्या दहावी आणि बारावी बोर्ड परीक्षांचे नियोजन, मूल्यमापन आणि निकाल जाहीर करणे ही त्यांची प्रमुख जबाबदारी असेल. राष्ट्रीय शैक्षणिक धोरण (NEP) ची प्रभावी अंमलबजावणी, अभ्यासक्रमात आधुनिक बदल, मूल्यमापन पद्धतीत सुधारणा आणि डिजिटल शिक्षणाचा विस्तार यासारख्या महत्त्वाच्या क्षेत्रांत ते काम करतील. गृह मंत्रालयातील आपल्या मुख्य जबाबदाऱ्या सांभाळतच ते या पदावर काम पाहतील.

ही नियुक्ती भारतीय शिक्षण क्षेत्रासाठी महत्त्वाची मानली जात आहे. एका तंत्रज्ञान पार्श्वभूमी असलेल्या अनुभवी प्रशासकाकडे शालेय शिक्षण मंडळ सोपवणे हे गुणवत्तापूर्ण आणि पारदर्शक प्रशासनाच्या दिशेने पाऊल आहे. पुण्यातील मराठी विद्यार्थ्यांसाठी ही नियुक्ती प्रेरणादायी ठरेल. लोखंडे यांच्या नेतृत्वात सीबीएसई बोर्ड अधिक आधुनिक, विद्यार्थीकेंद्रित आणि भविष्योन्मुख होईल, अशी अपेक्षा व्यक्त केली जात आहे.

देशातील लाखो विद्यार्थ्यांच्या भवितव्याशी निगडित असलेल्या सीबीएसई सारख्या संस्थेचा कारभार सांभाळताना प्रशांत लोखंडे यांना यश मिळावे, अशी सर्व शिक्षणप्रेमींना इच्छा आहे. त्यांच्या कार्यकाळात शिक्षण क्षेत्रात सकारात्मक बदल होतील, अशी आशा व्यक्त केली जात आहे.