नॅशनल स्कॉलरशिप पोर्टल अर्ज प्रक्रिया सुरू; दहावी ते पीएचडीपर्यंतच्या विद्यार्थ्यांना करता येणार अर्ज 

एज्युवार्ता न्यूज नेटवर्क 

वीनॅशनल स्कॉलरशिप पोर्टलच्या  (National Scholarship Portal) माध्यमातून शैक्षणिक सत्र २०२६-२७ (Academic Session 2026-27) साठी विविध शिष्यवृत्ती योजनांचे अर्ज  (Scholarship Scheme) आता सुरू झाले आहेत. पात्र विद्यार्थी आपल्या शैक्षणिक पात्रतेनुसार नवीन अर्ज  सादर करू शकतात, तर आधीपासून लाभ घेत असलेले विद्यार्थी शिष्यवृत्तीचे नूतनीकरण करू शकतात. प्री-मॅट्रिकपासून ते पोस्ट-मॅट्रिक, (Pre Matric Post Matric) पदवी, पदव्युत्तर, डिप्लोमा, प्रमाणपत्र अभ्यासक्रम आणि पीएचडीपर्यंतच्या विद्यार्थ्यांसाठी अनेक योजना उपलब्ध आहेत. या पोर्टलवर अर्ज करण्याची प्रक्रिया सुलभ आणि पारदर्शक (Simple and transparent process) ठेवण्यात आली आहे.

अर्ज करण्यापूर्वी प्रत्येक विद्यार्थ्याला वन टाईम रजिस्ट्रेशन पूर्ण करणे अनिवार्य आहे. यासाठी ओळखपत्र आणि सक्रिय मोबाइल क्रमांक आवश्यक आहे. ओळखपत्र नसल्यास नोंदणी आयडीच्या सहाय्यानेही हे नोंदणी पूर्ण करता येते. कोणतेही शुल्क आकारले जात नाही. नोंदणी झाल्यानंतर विद्यार्थी लॉगिन करून वैयक्तिक, शैक्षणिक व बँक संबंधित माहिती भरू शकतात आणि संबंधित योजनेची निवड करून आवश्यक कागदपत्रे अपलोड करून अर्ज सादर करू शकतात.

दहावीपर्यंत शिकणारे विद्यार्थी प्री-मॅट्रिक तर अकरावी-बारावीचे विद्यार्थी पात्रतेनुसार पोस्ट-मॅट्रिक योजनेसाठी अर्ज करू शकतात. पदवी व पदव्युत्तर अभ्यासक्रमांमध्ये बीए, बीएससी, बीकॉम, बीएड, बीटेक, एलएलबी, बीबीए तसेच एमए, एमएससी, एमबीए, एमकॉम, एमसीए, एमटेक, एलएलएम व एमएड यांचा समावेश आहे. डिप्लोमा, प्रमाणपत्र व पीएचडी करणारे पात्र विद्यार्थीही संबंधित योजनांसाठी अर्ज करू शकतात.

अर्ज भरण्यापूर्वी गुणपत्रिका, जात प्रमाणपत्र, उत्पन्न प्रमाणपत्र, ओळखपत्र आणि आवश्यक असल्यास बोनाफाइड प्रमाणपत्र तयार ठेवावे. शिष्यवृत्तीची रक्कम थेट लाभ हस्तांतरण पद्धतीने बँक खात्यात जमा होते. त्यासाठी खाते ओळखपत्राशी जोडलेले व एनपीसीआयमध्ये नोंदणीकृत असावे.

प्री-मॅट्रिकसाठी अर्जाची अंतिम मुदत ३१ ऑगस्ट २०२६ असून बहुतांश पोस्ट-मॅट्रिक व उच्च शिक्षण योजनांसाठी ३१ ऑक्टोबर २०२६ आहे. संस्था स्तरावर पडताळणी १५ नोव्हेंबर आणि जिल्हा-राज्य स्तरावर सत्यापन ३० नोव्हेंबर २०२६ पर्यंत पूर्ण होणे अपेक्षित आहे. पात्र विद्यार्थ्यांनी वेळेवर अर्ज सादर करून ही संधी गमावू नये.