नीट युजी २०२६ परीक्षा रद्द; एनटीए कार्यालयासमोर एबीव्हीपीचे जोरदार आंदोलन

एज्युवार्ता न्यूज नेटवर्क

नीट युजी २०२६ परीक्षेत पेपरफुटी आणि गंभीर अनियमिततेच्या आरोपांमुळे नॅशनल टेस्टिंग एजन्सी (NTA) ने परीक्षा रद्द करण्याचा धक्कादायक निर्णय घेतला आहे. ३ मे २०२६ रोजी देशभरात घेण्यात आलेल्या या परीक्षेनंतर पेपर लीक प्रकरण (Paper leak case) समोर आल्याने लाखो विद्यार्थ्यांच्या तयारीवर पाणी पडले आहे. या निर्णयानंतर अखिल भारतीय विद्यार्थी परिषद (ABVP) ने दिल्लीतील एनटीए मुख्यालयासमोर तीव्र निदर्शने (Intense Protests) सुरू केली आहेत. 

एबीव्हीपी कार्यकर्त्यांनी एनटीए कार्यालयाबाहेर मोठ्या संख्येने जमाव करत जोरदार घोषणाबाजी केली. “पेपरफुटी मुर्दाबाद, “एनटीए इस्तीफा दो”, “पारदर्शक परीक्षा हवी” अशा घोषणा देत कार्यकर्त्यांनी परीक्षा प्रक्रियेतील गंभीर त्रुटींवर तीव्र टीका केली. एबीव्हीपीने मुख्यतः तीन प्रमुख मागण्या केल्या आहेत:पेपरफुटी प्रकरणाची उच्चस्तरीय, निष्पक्ष आणि कालमर्यादित चौकशी करावी. दोषींवर कठोर कारवाई करावी. परीक्षा प्रणालीत सुधारणा करून भविष्यात अशा घटनांना रोखण्यासाठी ठोस उपाययोजना कराव्यात, अशी मागणी एबीव्हीपीकडून ठेवण्यात आल्या आहेत. 

परीक्षा रद्द झाल्याने देशभरातील नीट उमेदवारांमध्ये प्रचंड रोष आणि निराशा पसरली आहे. अनेक विद्यार्थ्यांनी पुन्हा परीक्षा घेण्याच्या निर्णयालाही विरोध दर्शवला आहे. एका वर्षाची तयारी वाया गेल्याने विद्यार्थ्यांचे शैक्षणिक भवितव्य टांगणीवर लटकले आहे. पालक आणि विद्यार्थ्यांकडून एनटीएच्या नियोजनावर तीव्र संताप व्यक्त करण्यात येत आहे. एबीव्हीपीने सरकार आणि एनटीएला इशारा देत म्हटले आहे की, विद्यार्थ्यांच्या भवितव्याशी कोणतीही खिलवाड सहन केली जाणार नाही. या प्रकरणात पूर्ण पारदर्शकता आणि जबाबदारी निश्चित करावी, अशी मागणी केली आहे.

सध्या परिस्थिती तणावपूर्ण आहे. एनटीएने विद्यार्थ्यांना नवीन परीक्षेच्या तारखेबाबत लवकरात लवकर माहिती देण्याचे आश्वासन दिले आहे, मात्र विद्यार्थी संघटनांनी सतत आंदोलन सुरू ठेवण्याचा इशारा दिला आहे.