स्पुक्टो'चे उच्च शिक्षण संचालक कार्यालयासमोर बेमुदत धरणे आंदोलन

एज्युवार्ता न्यूज नेटवर्क 

सावित्रीबाई फुले पुणे विद्यापीठीय व महाविद्यालयीन अध्यापक संघटनेतर्फे (स्पुक्टो) प्रलंबित मागण्यांसाठी उच्च शिक्षण संचालक कार्यालयासमोर १० ऑगस्ट २०२६ पासून बेमुदत धरणे आंदोलन सुरु असून चार दिवसापासून आंदोलक प्राध्यापक ठिय्या मांडून बसले आहेत. मात्र, प्रशासनाकडून कोणताही प्रतिसाद मिळत नाही.प्रशासनाने दिलेल्या आश्वासनाची कालमर्यादेत पूर्तता न केल्यामुळे हे आंदोलन पुन्हा सुरू करण्यात आल्याची माहिती संघटनेचे अध्यक्ष प्रा. प्रकाश वाळुंज आणि सरचिटणीस डॉ. प्रवीण ताटे-देशमुख यांनी दिली.

 संघटनेने ७ जुलै २०२६ रोजी बेमुदत धरणे आंदोलन केले होते. त्यावेळी २१ दिवसांत प्रश्न सोडवण्याचे लिखित आश्वासन प्रशासनाने दिल्याने आंदोलन तात्पुरते स्थगित करण्यात आले होते. मात्र, दिलेल्या मुदतीत कोणताही निर्णय न झाल्याने प्राध्यापकांनी पुन्हा आंदोलनाचे हत्यार उपसले आहे.

काय आहेत मुख्य मागण्या?

1. एम.फिल. धारक कंत्राटी प्राध्यापकांना पदोन्नतीचे लाभ देणे:

महाराष्ट्र शासनाच्या शिफारशीनुसार युजीसीने (UGC) जुलै २०२५ मध्ये एम.फिल. अर्हताधारक प्राध्यापकांना नेट/सेट (NET/SET) मधून वैधानिक सूट दिली आहे. राज्यातील इतर सर्व पात्र प्राध्यापकांना याचा लाभ देऊन पदोन्नती (CAS), वरिष्ठ वेतनश्रेणी व सेवालाभ देण्यात आले; परंतु मंजूर यादीतील कंत्राटी प्राध्यापकांना मात्र पदोन्नती नाकारली जात आहे. यामुळे प्राध्यापकांमध्ये तीव्र असंतोष आहे.

2. 'एनईपी-२०२०' अंतर्गत सर्व शैक्षणिक घटकांचा (All Academic Verticals) कार्यभार मोजणे:

राष्ट्रीय शैक्षणिक धोरण (NEP-2020) अंतर्गत शिक्षकांवर अनेक नवीन जबाबदाऱ्या आल्यामुळे कामाचा ताण वाढला आहे. असे असताना शासनाने चालू शैक्षणिक वर्षात प्राध्यापकांची पदे कमी केली आहेत. एनईपीच्या अंमलबजावणीसाठी सर्व शैक्षणिक घटकांचा (All Academic Verticals) कार्यभार मोजणे आवश्यक असून, तसे न झाल्यास या धोरणाच्या अपयशाची बिजे पेरली जातील, असा इशारा संघटनेने दिला आहे.

मागण्या मान्य होईपर्यंत उच्च शिक्षण संचालक कार्यालयासमोर आंदोलन सुरूच राहील, असा ठाम निर्धार 'स्पुक्टो' संघटनेने व्यक्त केला आहे.

---

प्रशासन दिलेल्या लेखी आश्वासनांची पूर्तता न करता प्राध्यापकांची फसवणूक करत असून विनाकारण प्राध्यापकांना त्यांच्या न्याय हक्कांसाठी रस्त्यावरती आणत आहे. हा प्राध्यापकांवरती अन्याय आहे, त्याचा स्पुक्टो संघटना तीव्र शब्दांत निषेध व्यक्त करते.

प्रा. डॉ. प्रवीण ताटे देशमुख , सरचिटणीस ( स्पुक्टो)