SPPU विद्यापीठाने केवळ नवीन कॉलेज मान्यतेसाठी नाही; विद्यार्थी प्रश्नासाठी विशेष अधिसभा बोलवावी

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या एकूण शैक्षणिक वाटचालीच्या इतिहासात प्रथमच केवळ नवीन महाविद्यालयांना मान्यता देण्यासंदर्भातील प्रस्तावांना मंजुरी देण्यासाठी विशेष अधिसभेचे आयोजन केले आहे. त्यामुळे शैक्षणिक क्षेत्रातून आश्चर्य व्यक्त केले जात आहे. त्यातच बँकेने जप्ती आणलेल्या काही संस्थांना नवीन महाविद्यालयासाठी मंजुरी देण्याचा प्रस्ताव आधिसभेत ठेवला जाणार असल्याचे बोलले जात आहे. एकीकडे कला, वाणिज्य, विज्ञान विद्याशाखेच्या महाविद्यालयांना विद्यार्थी मिळत नसताना आणखी नवीन महाविद्यालयांना मान्यता देण्याचा घाट का घातला जात आहे? असाही प्रश्न उपस्थित होत आहे. 

सावित्रीबाई फुले पुणे विद्यापीठाने 12 ऑगस्ट रोजी पत्रक प्रसिद्ध करून 14 ऑगस्ट रोजी दुपारी साडेअकरा वाजता विशेष अधिसभेचे आयोजन केले आहे. या आधिसभेत राज्याच्या काही मंत्र्यांनी व काही संस्थांनी शासनाकडे केलेल्या पत्रव्यवहारानंतर नवीन महाविद्यालयांना मान्यता देण्यासंदर्भातील प्रस्ताव मंजुरीसाठी ठेवले जाणार आहेत. सर्वसाधारणपणे नवीन महाविद्यालयांना मंजुरी देताना संबंधित महाविद्यालयाचे ऑनलाईन प्रस्ताव स्वीकारून प्रस्तावांची छाननी करून आणि विद्या परिषद व व्यवस्थापन परिषदेच्या मंजुरीनंतर आधिसभेच्या शिफारसी घेऊन नवीन महाविद्यालयांना मान्यता देण्याबाबत शासनाकडे प्रस्ताव सादर केले जातात. मात्र अशा पद्धतीने प्रस्तावांना मंजुरी देण्याची ही पहिलीच वेळ आहे. 

राज्य शासनाचा नवीन महाविद्यालयांना मान्यता देण्यासंदर्भातील पाच वर्षाचा बृहत आराखडा यापूर्वीच तयार करण्यात आला आहे. त्यात निश्चित केलेल्या बिंदूवर महाविद्यालयांना मान्यता दिली जाते. परंतु सध्या अधिसभेसमोर सादर केलेल्या महाविद्यालयांचे बिंदू बृहत आराखड्यामध्ये नाहीत. त्यामुळे विद्यापीठातर्फे नवीन महाविद्यालयांच्या मंजुरीचे प्रस्ताव सादर करताना कोणत्या नियमावलीचे पालन केले जात आहे,याबाबत अधिसभा सदस्यांकडून प्रश्न उपस्थित केले जाऊ शकतात.

दरम्यान, विद्यापीठाने विद्यार्थी प्रश्नांसाठी तसेच राष्ट्रीय शैक्षणिक धोरणाच्या अंमलबजावणीच्या संदर्भात आणि विद्यापीठाच्या घसरलेल्या रँकिंग वाढीसाठी विशेष अधिसभेचे आयोजन करावे, अशी मागणी अनेक वेळा विद्यापीठाच्या आधिसभा सदस्यांनी विद्यापीठाकडे केली होती. मात्र विद्यापीठ प्रशासनाने यापूर्वी कधी अशा विशेष अधिसभेचे आयोजन केले नव्हते. त्यामुळे काही आधिसभा सदस्य आक्रमक पवित्र घेतील, अशी शक्यता व्यक्त केली जात आहे.

---------------------

विद्यापीठाने कधीतरी विद्यार्थी प्रश्नासाठी सुद्धा आधिसभा बोलवावी. नुकतेच बोगस डिग्रीचे प्रकरण समोर आले, राष्ट्रीय शैक्षणिक धोरणाच्या अंमलबजावणीचे अनेक प्रश्न आहेत, विद्यार्थ्यांच्या सुरक्षेचे प्रश्न ऐरणीवर आहेत, अशा कोणत्याही प्रश्नांसाठी विशेष आधिसभेची बैठक बोलावली जात नाही. विद्यापीठाचे कुलगुरू यांनी कधीतरी विद्यार्थी हिताच्या प्रश्नासाठी सुद्धा आधिसभेची बैठक बोलावी.

- कृष्णा भंडलकर, अधिसभा सदस्य, सावित्रीबाई फुले पुणे विद्यापीठ, पुणे 

--------------

विद्यापीठाने नवीन महाविद्यालयांना मान्यता देण्यासाठी आधिसभा आयोजित केली आहे. मात्र, विद्यार्थी हितासाठी आणि विद्यार्थ्यांचे निकाल वेळेत लागावेत, त्यांना येणाऱ्या समस्या दूर व्हाव्यात या संदर्भातील प्रश्नांवर विशेष अधिसभा आयोजित केली तर विद्यापीठाचे अभिनंदन करता येईल.

- दादाभाऊ शिवलकर, अधिसभा सदस्य, सावित्रीबाई फुले पुणे विद्यापीठ, पुणे