वयाच्या अवघ्या १६ व्या वर्षी बनला CA; भारतीय वंशाच्या लक्ष्मणन मय्यप्पन याचा 'गिनीज वर्ल्ड रेकॉर्ड्स'

एज्युवार्ता न्यूज नेटवर्क 

सामान्यतः १६ व्या वर्षी विद्यार्थी दहावी किंवा बारावीच्या अभ्यासात आणि करिअरच्या निवडीबाबत संभ्रमात असतात. मात्र दुबईत राहणाऱ्या लक्ष्मणन मय्यप्पन  (Lakshmanan Mayyappan)  याने याच वयात प्रोफेशनल अकाउंटिंगची  (Professional Accounting) पात्रता मिळवून जगाला आश्चर्यचकित केले आहे. अवघ्या १६ वर्षे आणि १४१ दिवस (16 years 141 days) वयात त्याने गिनीज वर्ल्ड रेकॉर्ड्स ‘जगातील सर्वात तरुण (World's youngest male CA) पुरुष चार्टर्ड अकाउंटंट’ म्हणून घोषित केले आहे. भारतीय वंशाच्या  (Indian origin) या तरुणाने अत्यंत कमी वयात मोठे यश संपादन करून लाखो विद्यार्थ्यांसाठी प्रेरणा बनला आहे.

लक्ष्मणन मय्यप्पन यांचा फायनान्स क्षेत्रातील प्रवास कोरोना महामारीच्या काळात सुरू झाला. त्या वेळी त्याने दहावीची बोर्ड परीक्षा उत्तीर्ण केली होती. अवघ्या पंधराव्या वर्षी त्याने एसीसीएचे शिक्षण सुरू केले आणि सुमारे एका वर्षातच ते पूर्ण केले. आज तो केवळ सीएफए पात्रता मिळवून थांबला नाही, तर दुबईतील एका प्रतिष्ठित कंपनीत सीनियर रिसर्च अनालिस्ट म्हणूनही कार्यरत आह. त्याच्या या जलद आणि यशस्वी प्रवासाने अनेकांचे लक्ष वेधले आहे.

लॉकडाउनच्या काळात लक्ष्मणन याची फायनान्सविषयी आवड निर्माण झाली. त्याची आई स्वतः पात्र एसीसीए असून रिकाम्या वेळेत त्यांना अकाउंटिंगचे मूलभूत संकल्पना समजावून सांगू लागल्या. आईकडून मिळालेल्या मार्गदर्शनामुळे त्याला या क्षेत्रात अधिक रुची निर्माण झाली आणि त्याने स्वतः प्रोफेशनल पात्रता मिळवण्याचा निर्धार केला. अत्यंत कमी कालावधीत परीक्षा उत्तीर्ण करून त्याने आपली क्षमता सिद्ध केली.

एसीसीए पूर्ण केल्यानंतर लक्ष्मणन मय्यप्पन याने सीएफएची (चार्टर्ड फायनान्शियल अनालिस्ट) पात्रताही प्राप्त केली. सध्या तो फायनान्समध्ये एमएससीचे शिक्षण घेत असून दुबईच्या ‘सेंचुरी फायनान्शियल’ कंपनीत सीनियर रिसर्च अनालिस्ट पदावर काम करत आहे. तो फायनान्शियल मार्केटमधील गुंतवणूक आणि संशोधनाशी संबंधित महत्त्वाचे निर्णय घेत आहे. त्याचा शैक्षणिक आणि व्यावसायिक प्रवास अद्याप सुरूच आहे.

“माझ्यासाठी हे स्थान खूप महत्त्वाचे आहे. पण मी कधीही अभ्यासाकडे एका शर्यतीसारखे पाहिले नाही. खऱ्या जगात फायनान्स कसा काम करतो हे समजणे अधिक महत्त्वाचे होते. घाईघाईने शिकण्याऐवजी उत्सुकतेने शिकल्यास परिणाम अधिक प्रभावी ठरतात,” असे  आपल्या यशाबद्दल बोलताना लक्ष्मणन मय्यप्पन याने सांगितले. त्याच्या या विचारसरणीमुळे आणि मेहनतीमुळे त्याने अशक्य वाटणारे यश मिळवले आहे.