महाराजा जिवाजीराव शिंदे महाविद्यालयात आंतरराष्ट्रीय युवा दिन उत्साहात

एज्युवार्ता न्यूज नेटवर्क

महाराजा जिवाजीराव शिंदे महाविद्यालयात राष्ट्रीय सेवा योजना (एनएसएस) सिनिअर विभागाच्या वतीने आंतरराष्ट्रीय युवा दिन उत्साहपूर्ण वातावरणात साजरा करण्यात आला. यानिमित्त विद्यार्थ्यांसाठी मार्गदर्शनपर कार्यक्रमासह वृक्षारोपण आणि श्रमदानाचे आयोजन करण्यात आले.

कार्यक्रमाच्या अध्यक्षस्थानी महाविद्यालयाचे प्राचार्य डॉ. प्रकाश साळवे होते. यावेळी त्यांनी युवक शक्तीचे महत्त्व अधोरेखित करून विद्यार्थ्यांना शुभेच्छा दिल्या. डॉ. राजेंद्र ठाकरे आणि डॉ. राजाराम कानडे यांनी युवकांची सामाजिक जबाबदारी, राष्ट्रनिर्मितीतील त्यांची भूमिका तसेच बदलत्या परिस्थितीत युवकांसमोरील विविध संधी व आव्हाने याबाबत मार्गदर्शन केले.

कार्यक्रमाचे प्रास्ताविक राष्ट्रीय सेवा योजना कार्यक्रम अधिकारी डॉ. देवेंद्र बहिरम यांनी केले. युवकांनी राष्ट्रीय सण व उत्सवांमध्ये उत्स्फूर्त सहभाग घेऊन देशभक्तीची भावना व्यक्त करावी, असे आवाहन त्यांनी केले.

आंतरराष्ट्रीय युवा दिनाचे औचित्य साधून महाविद्यालय परिसरात वृक्षारोपण करण्यात आले. विद्यार्थ्यांनी श्रमदानातही उत्स्फूर्त सहभाग घेत सामाजिक बांधिलकीचा संदेश दिला. कार्यक्रमाच्या शेवटी राष्ट्रीय एकात्मतेच्या घोषणा देण्यात आल्या.

कार्यक्रम अधिकारी प्रा. भाऊ बुलाखे यांनी आभार मानले. यावेळी उपप्राचार्य डॉ. सुदाम भुजबळ, डॉ. नितीन थोरात, राष्ट्रीय सेवा योजनेच्या प्रा. प्राजक्ता वारे, प्रा. पी. व्ही. म्हस्के, प्रा. वाय. बी. लबडे, प्रा. एस. एस. कोपनर, प्रा. रायकर डी. एस. यांच्यासह महाविद्यालयातील प्राध्यापक उपस्थित होते.

या उपक्रमातून विद्यार्थ्यांमध्ये सामाजिक जाणीव, राष्ट्रीय भावना, पर्यावरण संवर्धनाची जबाबदारी आणि जबाबदार नागरिकत्वाची भावना निर्माण करण्याचा संदेश देण्यात आला. विद्यार्थ्यांच्या उत्स्फूर्त सहभागामुळे कार्यक्रमाला उदंड प्रतिसाद मिळाला.