विद्यापीठाच्या अधिष्ठाता पदाची अंतिम गुणवत्ता यादी जाहीर; संभाव्य उमेदवार कोण?

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या अधिष्ठाता निवड प्रक्रिया पूर्ण झाली असून विद्यापीठाने चारही विद्याशाखांच्या उमेदवारांच्या मुलाखतीनंतर अधिष्ठाता निवडीची एकत्रित गुणवत्ता यादी जाहीर केली आहे. त्यामुळे कोणत्या विद्या शाखेच्या अधिष्ठातापदी कोण विराजमान होणार? हे स्पष्ट झाले आहे. परिणामी सुमारे तीन वर्षानंतर पुणे विद्यापीठाला पूर्णवेळ अधिष्ठाता मिळाले आहेत.

सावित्रीबाई फुले पुणे विद्यापीठातर्फे प्रसिद्ध करण्यात आलेल्या अधिष्ठाता पदाच्या गुणवत्ता यादीनुसार हुमानिटी विद्याशाखेमधील खुल्या संवर्गातील प्रभाकर देसाई यांना सर्वाधिक 91.75 गुण मिळाले आहेत. एसी संवर्गातून आंतरविद्याशाखीय अभ्यास या विद्याशाखेसाठी सदानंद बनसोडे यांना सर्वाधिक 76.25 गुण मिळाले आहेत. कॉमर्स अँड मॅनेजमेंट विद्याशाखेमध्ये ओबीसी संवर्गातून धनंजय मंडलिक यांना सर्वाधिक 68 गुण मिळाले आहेत. तर एनटीडी संवर्गातून सायन्स अँड टेक्नॉलॉजी विद्याशाखेतील रावसाहेब लटपटे यांना सर्वाधिक 63. 88 गुण मिळाले असल्याचे दिसून येत आहेत. त्यामुळे आरक्षणाचा विचार करता अधिष्ठातापदासाठी हे संभाव्य उमेदवार असू शकतात. 

विद्यापीठाच्या संकेतस्थळावर 25 उमेदवारांची सर्वसाधारण मेरिट लिस्ट प्रसिद्ध करण्यात आली आहे. तसेच तसेच अपात्र उमेदवारांची यादी सुद्धा जाहीर करण्यात आली आहे. त्याचप्रमाणे मूळ कागदपत्रांची पडताळणी अंतिम छाननी मध्ये पूर्तता होत नसल्याने इतरही अपात्र उमेदवारांची यादी तयार करण्यात आली आहे. तसेच मुलाखतीस अनुपस्थित राहिलेल्या उमेदवारांची यादी सुद्धा जाहीर करण्यात आली आहे.

सावित्रीबाई फुले पुणे विद्यापीठाच्या अधिष्ठातापदासाठी प्राप्त झालेल्या अर्जांची छाननी करून सुमारे दोन वेळा विद्यापीठातर्फे पात्र व अपात्र उमेदवारांची यादी जाहीर करण्यात आली. त्यानंतर पाच ते दहा मे या कालावधीत अधिष्ठाता पदासाठी अर्ज केलेल्या पात्र उमेदवारांच्या मुलाखती घेण्यात आल्या.