पेपर फुटीमुळे नीट परीक्षा रद्द; पुन्हा परीक्षा द्यावी लागणार; सीबीआय चौकशी करणार 

एज्युवार्ता न्यूज नेटवर्क 

 नॅशनल टेस्टिंग एजन्सी तर्फे वैद्यकीय महाविद्यालयांच्या प्रवेशासाठी घेतली जाणारी राष्ट्रीय पात्रता व प्रवेश परीक्षा (NEET) पेपरफुटीच्या आरोपांमुळे रद्द करण्यात आल्याची माहिती समोर आली आहे. या निर्णयामुळे देशभरातील सुमारे 20 लाख विद्यार्थ्यांना पुन्हा परीक्षा द्यावी लागणार असून विद्यार्थ्यांसह पालकांमध्येही चिंतेचे वातावरण निर्माण झाले आहे.

एनटीए तर्फे ३ मे रोजी देशभरात ही परीक्षा घेण्यात आली होती. मात्र परीक्षेपूर्वीच प्रश्नपत्रिका सोशल मीडियावर, विशेषतः टेलिग्रामच्या माध्यमातून व्हायरल झाल्याचा आरोप समोर आला आहे. प्राथमिक माहितीनुसार, परीक्षा होण्याच्या तब्बल ४२ तास आधी प्रश्नपत्रिका काही विद्यार्थ्यांपर्यंत पोहोचल्याची धक्कादायक बाब उघड झाली आहे.

या गंभीर प्रकारानंतर संबंधित यंत्रणांनी परीक्षा रद्द करण्याचा निर्णय घेतला असून संपूर्ण प्रकरणाची चौकशी आता केंद्रीय अन्वेषण विभागाकडे (CBI) सोपवण्यात आली आहे. पेपरफुटीमागे नेमके कोण आहे, यामध्ये कोणत्या टोळीचा किंवा व्यक्तींचा सहभाग आहे, याचा तपास सीबीआयकडून केला जाणार आहे.

दरम्यान, नीटसारख्या अत्यंत महत्त्वाच्या आणि संवेदनशील परीक्षेचा पेपर फुटल्यामुळे शिक्षण व्यवस्थेवर प्रश्नचिन्ह उपस्थित होत आहे. विद्यार्थ्यांनी अनेक महिने कठोर मेहनत घेऊन परीक्षा दिल्यानंतर अचानक परीक्षा रद्द झाल्याने त्यांच्यावर मानसिक ताण वाढला आहे.

पुनर्परीक्षा नेमकी कधी घेतली जाणार, नवीन वेळापत्रक काय असेल आणि विद्यार्थ्यांना कोणत्या सूचना दिल्या जाणार याबाबत अद्याप अधिकृत घोषणा करण्यात आलेली नाही. मात्र या निर्णयाकडे देशभरातील विद्यार्थी आणि पालकांचे लक्ष लागले आहे.