शालार्थ ID घोटाळ्याप्रकरणी थेट शिक्षण उपसंचालकाला अटक

एज्युवार्ता न्यूज नेटवर्क 

राज्यात सध्या शिक्षण क्षेत्रात गाजत असलेल्या बनावट शालार्थ आयडी घोटाळ्यात (Shalarth ID scam case)आणखी एक धक्कादायक माहिती समोर आले आहे. नाशिक शहर आर्थिक गुन्हे शाखेने मोठी कारवाई करत बनावट शालार्थ आयडी तयार करून शासनाची आर्थिक फसवणूक केल्याप्रकरणी सेवानिवृत्त शिक्षण उपसंचालक नितीन उपासनी (Retired Deputy Director of Education Nitin Upasani)यांना अटक केली आहे. या घोटाळ्यातील मोठा मासा गळाला लावला असल्याची चर्चा सध्या शिक्षण वर्तुळात केली जात आहे. 

विभागीय नाशिक शिक्षण उपसंचालक कार्यालयातील लेखाधिकारी उदय पंचभाई आणि अधीक्षक राजमोहन शर्मा यांनी काही सहकारी कर्मचाऱ्यांशी संगणमत करून शालार्थ आयडी हा घोटाळा केला असल्याचे पोलीस तपासात उघड झाले होते.त्यानंतर पोलीस आयुक्त संदीप कर्णिक आणि पोलीस उप आयुक्त किरण कुमार चव्हाण यांनी यासंदर्भात सखोल तपास करण्याचे आदेश दिले होते. त्यानुसार वरिष्ठ पोलीस निरीक्षक रामदास शेळके यांच्या पथकाने याबाबत तपास केला. त्यात या प्रकरणात सेवानिवृत्त शिक्षण उपसंचालक नितीन उपासनी यांचा सहभाग असल्याचे निष्पन्न झाले. त्यानंतर उपासनी यांना अटक करण्यात आली आहे.

शिक्षण विभागात शालार्थ आयडीच्या नावाखाली अनेक घोटाळे समोर येत आहेत. काही दिवसांपूर्वी पुणे विभागीय शिक्षण उपसंचालक कार्यालयात शिक्षण उप निरीक्षकाला शालार्थ आयडीसाठी 1 लाख रुपयांची लाच घेताना रंगेहात पकडण्यात आले होते. त्यामुळे शिक्षण खाते भ्रष्टाचाराने बरबटले असून त्यात सुधारणा करण्यासाठी आवश्यक उपाययोजना करण्याची आवश्यकता असल्याचे बोलले जात आहे.