एम.ई.एस. पब्लिक स्कूल कळंबोली येथे आषाढी वारी,वृक्षारोपण  उत्साहात

एज्युवार्ता न्यूज नेटवर्क 

कळंबोली येथे महाराष्ट्र एज्युकेशन सोसायटीच्या एम.ई.एस. पब्लिक स्कूलतर्फे आषाढी एकादशीचे औचित्य साधून आषाढी वारी व वृक्षारोपण या संयुक्त उपक्रमाचे उत्साहपूर्ण आयोजन करण्यात आले. धार्मिक, सांस्कृतिक आणि पर्यावरण संवर्धनाचा संदेश देणाऱ्या या उपक्रमाला विद्यार्थी, पालक आणि शिक्षकांचा उत्स्फूर्त प्रतिसाद लाभला.

कार्यक्रमाची सुरुवात शाळेच्या माननीय प्राचार्या, पालक-शिक्षक संघाचे सदस्य आणि शिक्षकवृंद यांच्या हस्ते संत ज्ञानेश्वर महाराजांच्या प्रतिमेचे, ज्ञानेश्वरी ग्रंथाचे तसेच पालखीचे पूजन करून झाली. त्यानंतर विठ्ठलाची आरती करण्यात आली.

यावेळी इयत्ता पाचवीच्या विद्यार्थ्यांनी वारकरी आणि संतांच्या पारंपरिक वेशभूषेत टाळ-मृदंगाच्या गजरात दिंडी काढली. अभंग, भजन आणि हरिनामाच्या गजराने संपूर्ण शाळा परिसर भक्तिमय झाला. या उपक्रमातून विद्यार्थ्यांना संतपरंपरेचा आठशे वर्षांचा समृद्ध वारसा अनुभवण्याची संधी मिळाली. संतांचे कार्य, विचार आणि समाजप्रबोधनातील योगदान यांची ओळख करून देतानाच भक्तीभाव, शिस्त, समता, सहकार्य, सेवाभाव आणि एकता या जीवनमूल्यांची जोपासना करण्याचा संदेश देण्यात आला. कार्यक्रमाच्या शेवटी सर्व विद्यार्थ्यांना प्रसादाचे वाटप करण्यात आले.

यानंतर आयोजित वृक्षारोपण उपक्रमातून पर्यावरण संवर्धनाचा प्रभावी संदेश देण्यात आला. शाळेच्या परिसरात स्थानिक (देशी) वृक्षप्रजातींची लागवड करण्यात आली. स्थानिक हवामान व मातीशी सुसंगत असलेल्या या वृक्षांमुळे जैवविविधतेचे संवर्धन, पक्षी व फुलपाखरांसाठी नैसर्गिक अधिवास निर्मिती तसेच पर्यावरणाचा समतोल राखण्यास मदत होणार असल्याचे यावेळी सांगण्यात आले.

या उपक्रमात पालकांनीही उत्स्फूर्त सहभाग घेतल्याने कार्यक्रम अधिक अर्थपूर्ण ठरला. पर्यावरण संरक्षण ही प्रत्येकाची सामूहिक जबाबदारी असल्याचा संदेश विद्यार्थी, पालक आणि शिक्षकांपर्यंत प्रभावीपणे पोहोचला. या उपक्रमामुळे विद्यार्थ्यांमध्ये वृक्षसंवर्धनाची जाणीव निर्माण होऊन हिरवेगार, स्वच्छ आणि शाश्वत भविष्य घडविण्याची प्रेरणा मिळाल्याचे शाळेच्या वतीने सांगण्यात आले.