शिक्षक आमदार आसगावकरांना नव्या उमेदवारांचे आव्हान; पुण्यातील उमेदवारांचीच अधिक चर्चा

एज्युवार्ता न्यूज नेटवर्क 

पुणे शिक्षक मतदार संघ निवडणुकीचे वातावरण तापण्यास सुरुवात झाली असून इच्छुक उमेदवारांनी जोरदार तयारी सुरू केली आहे. दरम्यान, संचमान्यता निकष बदला विरोधात शुक्रवारी पुण्यात शिक्षण आयुक्त कार्यालयाबाहेर मोठे आंदोलन झाले.तसेच दुसऱ्या दिवशी जुनी पेन्शन योजना लागू करण्यासाठी मुक मोर्चा काढण्यात आला. या दोन्ही मोर्चात शिक्षक निवडणूक लढण्यास इच्छुक असलेले उमेदवार जोरदार भूमिका मांडताना दिसले. दोन्ही आंदोलनास शिक्षक संघटनांचा मोठा पाठिंबा होता. त्यामुळे येत्या शिक्षक मतदार संघ निवडणुकीत मागील निवडणूकीत विजयी झालेले आमदार जयंत आसगावकर यांना नव्या उमेदवारांचे आव्हान असणार आहे.

आगामी पुणे शिक्षक निवडणुकीच्या पार्श्वभूमीवर सध्या स्टँडिंग आमदार जयंत आसगावकर, मॉडर्न एज्युकेशन सोसायटीचे विश्वस्त प्रा. सचिन सानप, स्वामी संस्थेचे कौस्तुभ गावडे, एकनाथ शिंदे यांचे विश्वासू मंगेश चिवटे तसेच शिक्षक महामंडळाचे नंदकुमार सागर हे शिक्षक मतदार संघाची निवडणूक लढण्यास इच्छुक आहेत. सर्व उमेदवार अधिकाधिक मतदार नोंदणी करण्यासाठी प्रयत्न करत आहेत.त्यात एकही उमेदवार माघार घेणार नसल्याचे दिसून येत आहे. त्यामुळे यावेळी निवडणूक रंगतदार होण्याची शक्यता आहे.

पुण्यातील उमेदवार सचिन सानप यांनी बालगंधर्व रंगमंदीर येथे शिक्षक दिनानिमित्त कार्यक्रम घेऊन जोरदार शक्तीप्रदर्शन केले.हजारो शिक्षकांनी या कार्यक्रमास उपस्थिती लावली. केवळ माध्यमिक शिक्षकाचा नाही तर पारंपरिक व व्यावसायिक अभ्यासक्रमाच्या महाविद्यालयाचे प्राध्यापकाही मोठ्या संखेने या कार्यक्रमास उपस्थित होते.पुण्यातील मोठ्या शैक्षणिक संस्थांनी सानप यांना जाहीर पाठिंबा दिला आहे.त्यामुळे शिक्षण वर्तुळात सानप यांच्याबाबत चांगलीच चर्चा सुरू झाली आहे.

सध्या महाविकास आघाडी व महायुती म्हणून कोणत्याच राजकीय पक्षाने अद्याप आपला उमेदवार जाहीर केलेला नाही. परंतु, जयंत आसगावकर पुन्हा एकदा निवडणूक लढण्यास इच्छुक आहेत.सचिन सानप,मंगेश चिवटे,कौस्तुभ गावडे या सर्वांनी पत्रकार परिषद घेऊन आपली उमेदवारी जाहीर केली आहे. त्यातच मुख्याध्यापक महासंघ,महाराष्ट्र राज्य उच्च माध्यमिक व माध्यमिक शाळा संघटनेचे सचिव नंदकूमार सागर ही सुद्धा पुण्यातील उमेदवार असून त्यांनी सुध्दा जोरदार तयारी सुरू केली आहे.सागर यांना कॉग्रेस पक्षाकडून पाठिंबा मिळण्याची शक्यता व्यक्त केली जात आहे.त्यामुळे आसगांवकर यांना नव्या उमेदवारांना लढत द्यावी लागणार आहे.त्यातच उमेदवार जास्त असल्याने नोंदणी झालेल्या मातांचे विभाजन होणार आहे.परिणामी कोणता उमेदवार सर्वाधिक मतदारांपर्यंत नोंदणीसाठी पोहचतो,यावर पुढील समीकरणे अवलंबून असणार आहेत.

' एज्युवार्ता 'शी बोलताना आसगावकर म्हणाले, संचमान्यतेच्या निकष बदलाविरोधात सर्वप्रथम संभागृहात मी प्रश्न उपस्थित केला. शिक्षक व शिक्षकेतर कर्मचारी भरतीसाठी सातत्याने पाठपुरावा केला. जुनी पेन्शन योजना लागू करण्यासाठी मोर्चा काढला. टप्पा अनुदानास पात्र शिक्षकांसाठी केलेल्या पाठपुराव्याने अनेक शिक्षकांना वेतन सुरू झाले. सुमारे सात हजार शाळांना आवश्यक शैक्षणिक साहित्याचे वाटप केले.शिक्षकांचे प्रश्न सातत्याने मांडत राहिलो आणि आजही मांडत आहे. त्यामुळे आगामी शिक्षक मतदार संघ निवडणूक लढणार आहे.

दरम्यान, शिक्षक मतदार संघाव्या निवडणूकित उमेदवारांना पसंतीक्रम दिले जातात.दोन उमेदवारांमध्ये थेट निवडणूक झाल्यास त्यात विजय मिळवणे काही प्रमाणात अवघड जाते. येत्या निवडणुकीत सध्यातरी चार मुख्य उमेदवार निवडणुकीच्या रिंगणात असल्याचे सध्या तरी दिसून येत आहे. त्यामुळे जास्त नोंदणी केली तरी मतदार कोणाला कोणत्या पसंतीक्रम देतात यावर बरेच अवलंबून राहणार आहे.