मएसोच्या मुलींच्या विद्यालयात आषाढी एकादशीनिमित्त भक्तिमय पालखी सोहळा
पालखी सोहळ्यानिमित्त इयत्ता पाचवी ते सातवीच्या विद्यार्थिनींनी भगवान विठ्ठल, रुक्मिणी माता, संत ज्ञानेश्वर, संत तुकाराम, संत नामदेव, संत मुक्ताबाई, संत निवृत्तीनाथ, संत सोपानदेव आणि संत एकनाथ यांच्या वेशभूषा परिधान करून वारकरी परंपरेचे आकर्षक दर्शन घडविले.
Eduvarta
एज्युवार्ता न्यूज नेटवर्क
आषाढी एकादशीचे औचित्य साधून महाराष्ट्र एज्युकेशन सोसायटीच्या मुलींच्या विद्यालयात गुरुवारी (दि.23) पारंपरिक पालखी सोहळ्याचे भक्तिमय वातावरणात आयोजन करण्यात आले. विद्यार्थिनींच्या उत्स्फूर्त सहभागामुळे संपूर्ण विद्यालय परिसर विठ्ठलनामाच्या गजराने दुमदुमून गेला.
कार्यक्रमाची सुरुवात विद्यालयाचे मुख्याध्यापक वसावे, उपमुख्याध्यापिका पवार तसेच पर्यवेक्षिका लिमये यांच्या हस्ते संत ज्ञानेश्वर महाराजांच्या प्रतिमेचे व पालखीचे पूजन करून करण्यात आली.
यावेळी इयत्ता आठवी ‘अ’मधील विद्यार्थी रुद्र गंदुरकर याने लोकमान्य बाळ गंगाधर टिळक यांच्या जयंतीनिमित्त त्यांच्या जीवनकार्याचा आढावा सादर केला. तसेच प्रग्यान कळमकर याने आषाढी एकादशीचे धार्मिक, सांस्कृतिक आणि सामाजिक महत्त्व विद्यार्थिनींना समजावून सांगितले.
पालखी सोहळ्यानिमित्त इयत्ता पाचवी ते सातवीच्या विद्यार्थिनींनी भगवान विठ्ठल, रुक्मिणी माता, संत ज्ञानेश्वर, संत तुकाराम, संत नामदेव, संत मुक्ताबाई, संत निवृत्तीनाथ, संत सोपानदेव आणि संत एकनाथ यांच्या वेशभूषा परिधान करून वारकरी परंपरेचे आकर्षक दर्शन घडविले. विशेषतः इयत्ता सातवी ‘ब’च्या विद्यार्थिनींनी संतपरंपरेतील विविध भूमिका साकारून उपस्थितांची दाद मिळविली.
प्रार्थना चौक परिसरात पारंपरिक रिंगण सोहळ्याचे आयोजन करण्यात आले. पालखीचे पूजन करून रिंगणास प्रारंभ करण्यात आला. त्यानंतर विद्यालयाच्या आवारात निश्चित करण्यात आलेल्या मार्गावर पालखीची मिरवणूक काढण्यात आली. "विठ्ठल... विठ्ठल..." या अखंड नामगजराने संपूर्ण परिसर भक्तिरसात न्हाऊन निघाला.
कार्यक्रमाचे सूत्रसंचालन ज्येष्ठ शिक्षिका खाडे यांनी केले. या प्रसंगी विद्यालयातील सर्व शिक्षक, शिक्षकेतर कर्मचारी तसेच विद्यार्थिनी मोठ्या उत्साहाने सहभागी झाल्या. या उपक्रमातून विद्यार्थिनींमध्ये वारकरी परंपरा, संत साहित्य आणि भारतीय संस्कृतीबाबत आदरभाव निर्माण करण्याचा संदेश देण्यात आला.
