आणखी एका शिक्षण अधिकाऱ्याचे निलंबन; शिक्षण मंत्र्यांची घोषणा 

एज्युवार्ता न्यूज नेटवर्क 

शिक्षणाधिकारी आजही शिक्षकाकडून दहा दहा लाख रुपये घेतो. त्याच्यावर भ्रष्टाचाराचे आरोप आहेत.तसेच पूर्वी त्याच्यावर गुन्हे दाखल झालेले आहेत, तरीही अशा शिक्षणाधिकाऱ्याला आपण पाठीशी घालणार आहात का? असा संतप्त सवाल शिवसेनेचे विधान परिषदेचे आमदार किशोर दराडे यांनी अधिवेशनात उपस्थित केला. त्यावर कोणालाही पाठीशी घातले जाणार नाही. संबंधित अधिकाऱ्याचे निलंबन केले जाईल, अशी घोषणा राज्याचे शालेय शिक्षण मंत्री दादा भुसे यांनी केली. 

राज्यातील शिक्षण विभागाला भ्रष्टाचाराने पोखरले असून शालार्थ आयडी घोटाळ्याप्रकरणी राज्याच्या शिक्षण विभागाने एसआयटी स्थापन केली आहे. एसआयटीच्या माध्यमातून समोर आलेल्या प्रकरणांमध्ये संबंधितांवर कारवाई केली जात आहे. शासनाने एसआयटीला तीन महिन्यांची मुदतवाढ दिले आहे. त्यातच शिक्षण विभागात अजूनही भ्रष्टाचारी अधिकारी असून संबंधितांवर कारवाई का केली जात नाही. त्यांना पाठीशी का घातले जाते, असा सवाल विधान परिषदेत उपस्थित करण्यात आला. विधान परिषदेचे आमदार भाई जगताप, अभिजीत वंजारी, विक्रम काळे, यांच्यासह इतर आमदारांनी या चर्चेत सहभाग घेतला. 

आमदार किशोर दराडे म्हणाले, पुण्यातील बंडगार्डन पोलीस स्टेशनमध्ये अवैद्य संपत्ती जमा केल्याप्रकरणी गुन्हे दाखल असताना आणि त्याची चौकशी सुरू असताना संबंधित शिक्षण अधिकाऱ्याला पुन्हा नंदुरबार येथे नियुक्ती कोणी दिली? त्याला पुन्हा भ्रष्टाचार करण्याची संधी का उपलब्ध करून दिली. तो काही संत नाही आजही शिक्षकांकडून दहा-दहा लाख रुपये जमा करून वैद्य संपत्ती साठवत आहे. त्याला कोणाचा पाठिंबा आहे. आजही संबंधित शिक्षणाधिकारी विरोधात संघटनांकडून तक्रारी प्राप्त होतात. अशा भ्रष्ट अधिकाऱ्याची चौकशी करून त्याच्यावर कारवाई करणार का त्याची एसआयटीमार्फत चौकशी करणार का?

सुरवातीला चौकशी करून संबंधितांचे निलंबन केले जाईल,असे दादा भुसे यांनी सांगितले.मात्र, सर्व आमदारांनी केलेल्या मागणीचा विचार करून शालेय शिक्षण मंत्री दादा भुसे यांनी नंदूरबार येथील माध्यमिक शिक्षण अधिकारी यांचे निलंबन करण्याची घोषणा केली.