‘एमआयटी एडीटी’च्या विद्यार्थ्यांची ऐतिहासिक कामगिरी ; भारतातील सर्वात मोठ्या आरसी इलेक्ट्रिक विमानाची निर्मिती
एमआयटी एडीटी विद्यापीठाच्या स्कूल ऑफ इंजिनिअरिंग अँड सायन्स अंतर्गत एरोस्पेस इंजिनिअरिंग विभागातील विद्यार्थ्यांनी हे विमान पूर्णपणे स्वतः विकसित केले आहे.
eduvarta@gmail.com 
एज्युवार्ता न्यूज नेटवर्क
‘एमआयटी आर्ट, डिझाईन अँड टेक्नॉलॉजी’ (एमआयटी एडीटी) विद्यापीठाच्या विद्यार्थ्यांनी भारतातील सर्वात मोठे रेडिओ-कंट्रोल्ड (आरसी) इलेक्ट्रिक फिक्स्ड-विंग विमान यशस्वीरीत्या डिझाईन, विकसित आणि उड्डाण करत एरोस्पेस संशोधन क्षेत्रात ऐतिहासिक कामगिरी नोंदविली आहे. ‘टीम स्कायट्रेक’ने विकसित केलेल्या या प्रकल्पाला ‘प्रोजेक्ट गरुडा’ असे नाव देण्यात आले असून, या विमानाची ‘इंडिया बुक ऑफ रेकॉर्ड्स’ आणि ‘आशिया बुक ऑफ रेकॉर्ड्स’मध्ये नोंद झाली आहे.
एमआयटी एडीटी विद्यापीठाच्या स्कूल ऑफ इंजिनिअरिंग अँड सायन्स अंतर्गत एरोस्पेस इंजिनिअरिंग विभागातील विद्यार्थ्यांनी हे विमान पूर्णपणे स्वतः विकसित केले आहे. या प्रकल्पासाठी विद्यापीठाच्या ‘सेंटर फॉर रिसर्च, इनोव्हेशन अँड एंटरप्रेन्युअरशिप फॉर यंग अॅस्पिरंट्स’ (CRIEYA) मार्फत ४८ लाख रुपयांचा निधी उपलब्ध करून देण्यात आला.
९.२५ मीटर विंगस्पॅन आणि २६१ किलो वजन असलेले हे विमान भारतातील सर्वाधिक वजनाचे तसेच सर्वात मोठ्या विंगस्पॅनचे आरसी इलेक्ट्रिक विमान ठरले आहे. या विमानाच्या यशस्वी उड्डाणानंतर त्याची अधिकृत नोंद विक्रम पुस्तिकांमध्ये करण्यात आली.
गेल्या चार वर्षांपासून सुरू असलेल्या या प्रकल्पात विद्यार्थ्यांना अनेक तांत्रिक अडचणींचा सामना करावा लागला. प्रोपल्शन सिस्टीम, स्ट्रक्चरल डिझाईन, फ्लाइट कंट्रोलर ट्युनिंग आणि प्रतिकूल हवामान यांसारख्या आव्हानांवर मात करत विद्यार्थ्यांनी सातत्याने संशोधन आणि चाचण्या सुरू ठेवल्या. अखेर ४ मे २०२६ रोजी धुळे येथील धावपट्टीवर या विमानाने यशस्वी टेक-ऑफ, नियंत्रित उड्डाण आणि सुरक्षित लँडिंग करत नवा विक्रम प्रस्थापित केला.
विद्यार्थ्यांनी विमानाची रचना, एरोडायनॅमिक्स विश्लेषण, आरटीके-जीपीएस नेव्हिगेशन, इलेक्ट्रिक प्रोपल्शन सिस्टीम, फ्लाइट टेस्टिंग आणि रिमोट पायलटिंग यांसह सर्व तांत्रिक कामे स्वतंत्रपणे पूर्ण केली.
या प्रकल्पाला प्रा. डॉ. मंगेश कराड यांचे मार्गदर्शन लाभले असून, भविष्यात ई-व्हीटॉल इलेक्ट्रिक एअर टॅक्सी आणि प्रगत यूएव्ही संशोधन क्षेत्रात काम करण्याचा मानस ‘टीम स्कायट्रेक’ने व्यक्त केला आहे.
‘गरुडा’ची वैशिष्ट्ये…
* भारतातील सर्वाधिक वजनाचे आरसी विमान – २६१ किलो
* भारतातील सर्वात मोठ्या विंगस्पॅनचे आरसी विमान – ९.२५ मीटर
* आत्तापर्यंत विमानाच्या संशोधन व उड्डाणासाठी ४८ लाख रुपयांचा खर्च
* टेक-ऑफसाठी आवश्यक अंतर – २०० मीटर
* उड्डाण क्षमता (एन्ड्युरन्स) – १० मिनिटे
* कमाल उंची – १०० मीटर (एजीएल)
* पेलोड क्षमता – १०० किलोग्रॅम
* कमाल वेग – ८० किमी प्रतितास
* विंगस्पॅन – ९.२५ मीटर
* बॅटरी प्रकार – लि-पो २२० एएच बॅटरी
* बॅटरी व्होल्टेज – १०० व्होल्ट
