सोलापूर विद्यापीठात पीएच.डी. प्रवेशासाठी पेट परीक्षा २२-२३ नोव्हेंबरला; अर्जांची अंतिम मुदत संपली 

पुण्यश्लोक अहिल्यादेवी होळकर सोलापूर विद्यापीठाने यंदाच्या शैक्षणिक वर्षासाठी पीएच.डी. प्रवेश प्रक्रिया सुरू केली असून, एकूण ४४८ जागांकरिता ऑनलाइन पात्रता परीक्षा (पेट) २२ व २३ नोव्हेंबर रोजी आयोजित करण्यात आली आहे. अर्ज सादर करण्याची अंतिम मुदत आज १६ नोव्हेंबर असून, आतापर्यंत सुमारे एक हजार आठशे उमेदवारांनी अर्ज भरले आहेत.

सोलापूर विद्यापीठात पीएच.डी. प्रवेशासाठी पेट परीक्षा २२-२३ नोव्हेंबरला; अर्जांची अंतिम मुदत संपली 

एज्युवार्ता न्यूज नेटवर्क

पुण्यश्लोक अहिल्यादेवी होळकर सोलापूर विद्यापीठाने यंदाच्या शैक्षणिक वर्षासाठी पीएच.डी. प्रवेश प्रक्रिया सुरू केली असून, एकूण ४४८ जागांकरिता ऑनलाइन पात्रता परीक्षा (पेट) २२ व २३ नोव्हेंबर रोजी आयोजित करण्यात आली आहे. अर्ज सादर करण्याची अंतिम मुदत आज १६ नोव्हेंबर असून, आतापर्यंत सुमारे एक हजार आठशे उमेदवारांनी अर्ज भरले आहेत. विद्यापीठाच्या परीक्षा विभागाकडून ही माहिती देण्यात आली. ऑनलाइन पद्धतीने होणाऱ्या या परीक्षेमुळे विद्यार्थ्यांना घरबसल्या परीक्षा देता येणार आहे.

रसायनशास्त्र, कॉम्प्युटर सायन्स अँड इंजिनिअरिंग, फार्मसी, इलेक्ट्रॉनिक इंजिनिअरिंग आणि इंग्रजी या विषयांमध्ये सर्वाधिक जागा उपलब्ध करण्यात आल्या आहेत. याशिवाय मेकॅनिकल इंजिनिअरिंग, कॉमर्स, इतिहास, प्राणिशास्त्र, हिंदी, शिक्षणशास्त्र आणि भूगोल या विषयांमध्येही प्रत्येकी दोन अंकी जागा देण्यात आल्या आहेत. विविध शाखांमध्ये संधी उपलब्ध असल्याने अनेक विषयांतील विद्यार्थ्यांना आकर्षित करणारी ही प्रक्रिया ठरली आहे.

पेट परीक्षेचे आयोजन दोन दिवस करण्यात आले आहे. २२ नोव्हेंबर रोजी सकाळी नऊ ते दुपारी बारा या वेळेत कॉमन पेपर तर दुपारी एक ते चार या वेळेत संबंधित विषयाचा स्पेशल पेपर घेतला जाणार आहे. २३ नोव्हेंबर रोजीही परीक्षेचे नियोजन केले आहे. परीक्षेचा निकाल २७ नोव्हेंबरला जाहीर होणार असून, विद्यार्थी विद्यापीठाच्या ऑनलाइन पोर्टलवरील स्वतःच्या लॉगिनमधून तो पाहू शकतील.

परीक्षा पारदर्शक आणि सुरळीत पार पडण्यासाठी विद्यापीठाने विशेष खबरदारी घेतली आहे. परीक्षेदरम्यान तांत्रिक अडचणी उद्भवल्यास मदत मिळावी यासाठी दोन तज्ज्ञांचे संपर्क क्रमांक उपलब्ध करून दिले जाणार आहेत. विशेष पथक सर्व उमेदवारांच्या कामकाजावर लक्ष ठेवणार असून, संपूर्ण परीक्षेचे व्हिडिओ रेकॉर्डिंगही केले जाणार आहे. संभाव्य तांत्रिक समस्यांचे तातडीने निराकरण करण्यासाठी यंत्रणा सज्ज ठेवण्यात आली आहे.