सातवी-आठवीच्या विद्यार्थ्यांसाठी आपत्ती व्यवस्थापन पुस्तिका; २० कोटींचा खर्च मंजूर, शासन निर्णय प्रसिद्ध 

महाराष्ट्र सरकारने नैसर्गिक आणि मानवनिर्मित आपत्तींबद्दल शालेय विद्यार्थ्यांमध्ये लहान वयापासूनच जागरूकता निर्माण करण्यासाठी एक महत्त्वपूर्ण निर्णय घेतला आहे. मदत आणि पुनर्वसन विभागाने याबाबत नुकताच शासन निर्णय प्रसिद्ध केला आहे.

सातवी-आठवीच्या विद्यार्थ्यांसाठी आपत्ती व्यवस्थापन पुस्तिका; २० कोटींचा खर्च मंजूर, शासन निर्णय प्रसिद्ध 

एज्युवार्ता न्यूज नेटवर्क

महाराष्ट्र सरकारने नैसर्गिक आणि मानवनिर्मित आपत्तींबद्दल शालेय विद्यार्थ्यांमध्ये लहान वयापासूनच जागरूकता निर्माण करण्यासाठी एक महत्त्वपूर्ण निर्णय घेतला आहे. मदत आणि पुनर्वसन विभागाने याबाबत नुकताच शासन निर्णय प्रसिद्ध केला आहे. त्यानुसार राज्यातील इयत्ता सातवी आणि आठवीच्या विद्यार्थ्यांना प्रायोगिक तत्त्वावर आपत्ती व्यवस्थापन विषयक विशेष पुस्तिका उपलब्ध करून देण्यात येणार आहेत. या उपक्रमासाठी सुमारे २० कोटी रुपयांचा खर्च अपेक्षित आहे. गेल्या काही वर्षांत हवामान बदल, पर्यावरणीय बिघाड आणि औद्योगिकीकरणामुळे आपत्तींची वारंवारता व तीव्रता वाढल्यामुळे विद्यार्थ्यांना पूर्वतयारी शिकवणे आवश्यक झाले आहे.

या पुस्तिकेत विविध नैसर्गिक व मानवनिर्मित आपत्तींचा सविस्तर आढावा घेतला जाईल. प्रत्येक आपत्तीबाबत आपत्तीपूर्व तयारी, आपत्तीकाळातील योग्य उपाययोजना आणि आपत्तीनंतरची पुनर्बांधणी या तीन टप्प्यांवर मार्गदर्शन असेल. तसेच काय करावे व काय करू नये याबाबत स्पष्ट माहिती दिली जाईल. १५ व्या वित्त आयोगाच्या शिफारशीनुसार पूर्वतयारी व क्षमता बांधणी अंतर्गत हा कार्यक्रम राबविण्यात येणार आहे. पुस्तिकेची मांडणी कथाकथन पद्धतीने करून विद्यार्थ्यांना विषय सहज समजेल अशी रचना केली जाईल.

छायाचित्रे, इन्फोग्राफिक्स आणि क्यूआर कोडचा वापर करून आपत्तींचे प्रकार व तीव्रता स्पष्ट केली जाईल. प्रस्तावना पृष्ठावर संपूर्ण आशयाचा आढावा देणाऱ्या ऑडिओ-व्हिज्युअल सादरीकरणाचा क्यूआर कोड अनिवार्य असेल. विद्यार्थ्यांना आकर्षित करण्यासाठी विशेष कार्टून पात्र विकसित केले जाईल आणि प्रत्येक आपत्तीची माहिती सुमारे २०० ते ४५० शब्दांत सादर केली जाईल. आपत्तींची मांडणी इंग्रजी वर्णमालेच्या क्रमानुसार असेल तसेच भूतकाळातील मोठ्या आपत्तींचाही आढावा घेतला जाईल.

पर्यावरण संवर्धन, आपत्तींची कारणे-परिणाम, प्रतिबंधक उपाय, पूर्वसूचना यंत्रणा आणि स्वतःसह इतरांचा बचाव यावर विशेष भर देण्यात येईल. विद्यार्थ्यांचे वय व बौद्धिक क्षमता लक्षात घेऊन आशय सोप्या व रंजक पद्धतीने मांडला जाईल. यामुळे भविष्यात आपत्तींना तोंड देण्यासाठी तरुण पिढी अधिक सक्षम बनेल, असा विश्वास व्यक्त केला जात आहे.