सीबीएसईच्या दहावी- बारावीच्या परीक्षांना बुधवारपासून सुरूवात 

सीबीएसईच्या दहावी- बारावीच्या परीक्षांना बुधवारपासून सुरूवात 

केंद्रीय माध्यमिक शिक्षण बोर्ड म्हणजेच, सीबीएसई बोर्डाच्या (CBSE Board) दहावी आणि बारावीच्या परीक्षांना बुधवारपासून ( दि.१५) सुरूवात होत आहे.यंदा सीबीएसई बोर्डाच्या परीक्षेस सुमारे ३८ लाख विद्यार्थी बसणार आहेत. सीबीएसई बोर्डाच्या दहावीच्या परीक्षेला एकूण २१.८ लाख विद्यार्थी तर बारावीच्या परीक्षेस १६.९ लाख विद्यार्थी बसणार आहेत. देशभरातील ७ हजार २०० केंद्रांवर परीक्षा घेण्यात येणार आहेत.

      CBSE बोर्डाची परीक्षा सकाळी १०.३० ते दुपारी १.३० या वेळेत घेण्यात येणार आहे. परीक्षेआधी विद्यार्थ्यांसाठी बोर्डाकडून काही मार्गदर्शक सूचना जारी केल्या आहेत. या सूचनांची काळजी विद्यार्थ्यांना घ्यावी लागणार आहे.सकाळी १० वाजल्यानंतर कोणत्याही विद्यार्थ्याला परीक्षा केंद्रात प्रवेश मिळणार नाही, त्यामुळे परीक्षेला वेळेवर जावे. वेळेपूर्वी केंद्रावर पोहोचावे.परीक्षेला जाताना विद्यार्थ्यांनी शालेय गणवेश परिधान करावा आणि शाळेचे ओळखपत्र सोबत ठेवावे. तसेच विद्यार्थ्याकडे सीबीएसईचे प्रवेशपत्र (Hall Ticket) असावे.विद्यार्थ्यांना

केंद्राकडून परवानगी असलेले स्टेशनरी साहित्य (Stationery) परीक्षा केंद्रावर घेऊन जाता येईल. त्याव्यतिरिक्त इतर कोणतंही साहित्य सोबत घेऊन जाता येणार नाही.

विद्यार्थ्यांना कोणतीही इलेक्ट्रॉनिक उपकरणं किंवा मोबाईल फोन, जीपीएस, कॅल्क्युलेटर, गॅझेट्स, इलेक्ट्रॉनिक घड्याळे इत्यादी सोबत बाळगता येणार नाही.विद्यार्थ्यांनी परीक्षेसंदर्भात कोणत्याही प्रकारच्या अफवा पसरवू नये आणि कोणत्याही प्रकारच्या अफवांना बळी पडू नये.