मोठी बातमी: D.Y.Patil B- School ची तब्बल 5 कोटींची फसवणूक;माजी संचालकाविरूद्ध गुन्हा दाखल, रोहिणी सोमनाथ पाटील यांची पोलिसांकडे तक्रार
गावंडे यांनी बेकायदेशीर रित्या संस्थेची तब्बल 4 कोटी 98 लाख 66 हजार रुपयांची आर्थिक फसवणूक करून आर्थिक अपहार केला आहे. तसेच स्वतःच्या ताब्यात असलेल्या लॅपटॉप मधील डेटा संस्थेच्या गोपनीय दस्तऐवज फाईली या हार्डडिस्कमध्ये घेऊन स्वतःच्या ताब्यात ठेवून लॅपटॉप फॉरमॅट करून पुरावा नष्ट केला आहे,
eduvarta@gmail.com 
एज्युवार्ता न्यूज नेटवर्क
पिंपरी-चिंचवड परिसरातील नामांकित शिक्षण संस्था म्हणून ओळखल्या जाणाऱ्या डॉ. डी. वाय. पाटील बी-स्कूलमध्ये तब्बल 5 कोटी रुपयांचा आर्थिक गैरव्यवहार झाल्याची धक्कादायक माहिती समोर आली आहे. डॉ. डी. वाय. पाटील बी-स्कूलचे माजी संचालक अमोल आनंदराव गावंडे यांच्याविरुद्ध आर्थिक गुन्हे शाखेने सुमारे ४.९८ कोटी रुपयांच्या कथित आर्थिक गैरव्यवहाराप्रकरणी गुन्हा दाखल केला आहे.याप्रकरणी युनिटेक सोसायटीच्या खजिनदार डॉ. रोहिणी सोमनाथ पाटील यांनी वाकड पोलीस ठाण्यात तक्रार दिली आहे.
बी-स्कूलचे संचालक म्हणून कार्यरत असताना गावंडे यांनी आपल्या अधिकारांचा गैरवापर केल्याचा आरोप करण्यात आला आहे. त्यांनी संस्थेत आर्थिक अनियमिततेचा संशय आल्यानंतर नोव्हेंबर २०२५ मध्ये फॉरेन्सिक ऑडिट करण्यात आले होते. त्यात सुमारे ४ कोटी ९८ लाख ६६ हजार रुपयांचे आर्थिक नुकसान झाल्याचे समोर आल्याने पोलिसांकडे ही तक्रार दाखल करण्यात आली आहे.
एफआयआरनुसार, अमोल गावंडे यांनी संचालक पदाचा गैरवापर करून स्वतःच्या पदाच्या अधिकाराखाली कार्यरत असणाऱ्या व्यक्तींच्या मार्फत संस्थेतील प्रवेश प्रक्रियेमध्ये ऍडमिशन सल्लागारा मार्फत आर्थिक अपहार केला आहे. तसेच मानद प्राध्यापक यांना बेकायदेशीर वेतन वाटप केले असून बायोमेट्रिक उपस्थिती नसताना शिक्षकांचे व इतर स्टाफचे बेकायदेशीर पगार केले आहेत. गावंडे यांनी बेकायदेशीर रित्या संस्थेची तब्बल 4 कोटी 98 लाख 66 हजार रुपयांची आर्थिक फसवणूक करून आर्थिक अपहार केला आहे. तसेच स्वतःच्या ताब्यात असलेल्या लॅपटॉप मधील डेटा संस्थेच्या गोपनीय दस्तऐवज फाईली या हार्डडिस्कमध्ये घेऊन स्वतःच्या ताब्यात ठेवून लॅपटॉप फॉरमॅट करून पुरावा नष्ट केला आहे,असा आरोप तक्रारीमध्ये करण्यात आला असून याबाबत पोलिसांकडे तक्रार देण्यात आली आहे.
या प्रकरणात माहिती तंत्रज्ञान कायद्यातील विविध कलमांनुसार गुन्हा दाखल करण्यात आला आहे. तक्रारीत काही माजी कर्मचाऱ्यांचा उल्लेख असला, तरी एफआयआरमध्ये केवळ अमोल आनंदराव गावंडे हे एकमेव आरोपी आहेत.स्वत: युनिटेक सोसायटीच्या खजिनदार डॉ. रोहिणी सोमनाथ पाटील यांनी याबाबत पोलिसांकडे तक्रार दिली आहे.
