विद्यापीठ अधिकारी,कर्मचारी करणार उच्च शिक्षण संचालक कार्यालयासमोर आंदोलन 

एज्युवार्ता न्यूज नेटवर्क 

सावित्रीबाई फुले पुणे विद्यापीठातील अनुकंपा व सेवानिवृत्ती वेतनाचे प्रलंबित प्रस्ताव ,वेतन निश्चितीची प्रकरणे तातडीने मंजूर करावीत, याबाबत गेल्या काही महिन्यांपासून पाठपुरावा केला जात आहे. मात्र, पुढील आठ दिवसात यासंदर्भात कर्मचाऱ्यांना सेवानिवृत्तीचे लाभ मिळाले नाही; तर आंदोलन केले जाईल, असा इशारा सावित्रीबाई फुले पुणे विद्यापीठ अधिकारी व शिक्षकेतर सेवक कृती समितीतर्फे निवेदनाद्वारे देण्यात आला आहे.

गेल्या काही वर्षांपासून विद्यापीठातील कर्मचाऱ्यांच्या पदनाम बदला संदर्भातील प्रकरण न्यायालयात प्रलंबित आहे. त्यामुळे सेवानिवृत्तीनंतर या कर्मचाऱ्यांना निवृत्तीच्या वेतनाचे लाभ मिळण्यास अनेक अडचणी निर्माण झाल्या आहेत. परंतु, राज्य शासनाने पूर्वीच्या वेतन निश्चितीनुसार जे सेवानिवृत्त कर्मचारी सेवानिवृत्तीचे लाभ स्वीकारण्यास तयार आहेत, त्यांना लाभ दिले जात आहेत. भादलीकर यांच्याप्रमाणे विद्यापीठातील कर्मचाऱ्यांना लाभ देण्यासंदर्भात निर्णय घ्यावा, असे निवेदन पुणे विभागीय उच्च शिक्षण सहसंचालक व उच्च शिक्षण संचालक कार्यालयाकडे देण्यात आले आहे. 

विद्यापीठातील सुमारे 29 कर्मचाऱ्यांना भादलीकर यांच्याप्रमाणे सहा फेब्रुवारी 2025 पूर्वीच सेवानवृत्तीचे लाभ घेण्यात आले आहेत. त्याचप्रमाणे इतर 40 कर्मचाऱ्यांची प्रकरणे संचालक कार्यालयाकडे सादर करण्यात आली आहेत. मात्र, त्यावर निर्णय घेतला जात नसल्याने कृती समितीने पुन्हा एकदा निवेदन देऊन आंदोलन करण्याचा इशारा दिला आहे. जे कर्मचारी भादलीकर यांच्याप्रमाणे लाभ स्वीकारण्यास तयार आहेत. त्यांच्याबाबत लवकरात लवकर आवश्यक कार्यवाही करावी, अशी मागणी सावित्रीबाई फुले पुणे विद्यापीठ ऑफिसर फोरमचे अध्यक्ष डॉ.मुंजाजी रासवे, महाराष्ट्र विद्यापीठ कर्मचारी महासंघाचे उपाध्यक्ष अशोक रानवडे, महासचिव संतोष मदने, सावित्रीबाई फुले पुणे विद्यापीठ कर्मचारी संघाचे अध्यक्ष सतीश वाघमारे, बाळासाहेब अंत्रे, किशोर घडीयार यांनी केली आहे.