यूपीएससी ने २७ नवीन भरतींच्या तारखा केल्या जाहीर, संपूर्ण वेळापत्रक पहा

एज्युवार्ता न्यूज नेटवर्क 

देशभरातील स्पर्धा परीक्षा देणाऱ्या विद्यार्थ्यांसाठी मोठी अपडेट समोर आली आहे. संघ लोकसेवा आयोगाने ( UPSC) वर्ष 2027 साठीचे अधिकृत परीक्षा कॅलेंडर जाहीर केले असून त्यामध्ये IAS, IPS, IFS, NDA, CDS, अभियांत्रिकी सेवा, CAPF यांसह तब्बल 27 परीक्षा आणि भरती प्रक्रियांच्या तारखा (27 Exam Dates) जाहीर करण्यात आल्या आहेत. या कॅलेंडरमुळे लाखो उमेदवारांना तयारीचे नियोजन करण्यास मोठी मदत होणार आहे. आयोगाने परीक्षा, नोटिफिकेशन, अर्जाची अंतिम तारीख आणि मुख्य परीक्षांचे वेळापत्रक एकाच PDF मध्ये प्रसिद्ध (Examination Schedule Released) केले आहे. 

संघ लोकसेवा आयोगाच्या वेळापत्रकानुसार, नागरी सेवा परीक्षा (CSE), NDA, CDS, अभियांत्रिकी सेवा, CAPF आणि संयुक्त भू-वैज्ञानिक यांसारख्या प्रमुख परीक्षांच्या तारखा स्पष्ट करण्यात आल्या आहेत. आयोगाच्या कॅलेंडरनुसार संयुक्त भू-वैज्ञानिक पूर्वपरीक्षा 10 जानेवारी 2027 रोजी होणार असून 13 जानेवारीला UPSC नागरी सेवा परीक्षा २०२७ चे अधिकृत नोटिफिकेशन जारी केले जाणार आहे. तसेच 31 जानेवारीला अभियांत्रिकी सेवा (पूर्व) परीक्षा होणार असून UPSC CSE साठी अर्ज करण्याची अंतिम तारीख 2 फेब्रुवारी 2027 निश्चित करण्यात आली आहे. संरक्षण क्षेत्रातील प्रतिष्ठित NDA आणि NA परीक्षा (I) आणि CDS परीक्षा (I) या दोन्ही परीक्षा 11 एप्रिल 2027 रोजी होणार आहेत.

देशातील सर्वात प्रतिष्ठित मानल्या जाणाऱ्या UPSC नागरी सेवा पूर्व परीक्षा २०२७ ही परीक्षा 23 मे 2027 रोजी पार पडणार असून त्यानंतर 20 ऑगस्ट 2027 पासून मुख्य परीक्षा सुरू होणार आहे. केंद्रीय सुरक्षा दलांमधील अधिकारी पदांसाठीची CAPF परीक्षा ऑगस्टच्या पहिल्या आठवड्यात होण्याची शक्यता असून NDA, NA परीक्षा (II), CDS परीक्षा (II) या परीक्षा 19 सप्टेंबर 2027 रोजी आयोजित करण्यात येणार आहेत. युपीएससीने जाहीर केलेल्या या वेळापत्रकामुळे लाखो विद्यार्थ्यांना वर्षभराच्या अभ्यासाचे आणि तयारीचे नियोजन करणे सोपे होणार असल्याचे मानले जात आहे.

स्पर्धा परीक्षेची तयारी करणाऱ्या विद्यार्थ्यांना वर्षभराचा अभ्यास आराखडा तयार करण्यासाठी हे कॅलेंडर अत्यंत महत्त्वाचे मानले जाते. नोटिफिकेशन आणि परीक्षा तारखा आधीच स्पष्ट झाल्याने उमेदवारांना अभ्यास, टेस्ट सिरीज आणि रिव्हिजनचे नियोजन करणे सोपे होणार आहे. युपीएससीने स्पष्ट केले आहे की, आवश्यक परिस्थितीनुसार परीक्षा तारखांमध्ये बदल होऊ शकतो. त्यामुळे उमेदवारांनी अधिकृत वेबसाइटवरील अपडेट्स नियमितपणे तपासत राहावे.