गट-ब व गट-क जाहिरात प्रसिद्ध करा, अन्यथा आंदोलन करू; स्पर्धा परीक्षा समन्वय समिती इशारा.. 

एज्युवार्ता न्यूज नेटवर्क 

MPSC संयुक्त गट-ब व गट-क जाहिरात २०२४ (MPSC Combined Group-B & Group-C Advertisement 2024) अनेक महिन्यांपासून रखडली आहे. मराठा आरक्षणामुळे (Maratha Reservation) जाहिरातीत बदल करायचा असे कारण मिळत असले तरी एकंदरीतच बेरोजगारांच्या बाबतीत सरकारचे वेळखाऊ धोरण याला जबाबदार आहे. संयुक्त गट-ब आणि गट-क परीक्षेची जाहिरात येत्या पंधरा दिवसांत प्रसिद्ध करावी (Publish the exam advertisement) अन्यथा उमेदवारांकडे आंदोलनाशिवाय पर्याय नाही, असा इशारा स्पर्धा परीक्षा समन्वय समितीने (Competitive Examination Coordination Committee) दिला आहे. 

अराजपत्रित संयुक्त गट-ब आणि गट-क जाहिरात 2024 जुलै महिना संपायला आला तरी प्रसिद्ध करण्यात आलेली नाही. सामाजिक आणि शैक्षणिक मागास वर्गाकरिता (SEBC) नव्याने आरक्षण दिल्याने, त्याप्रमाणे पदसंख्या आणि आरक्षण नमूद करून जाहिरात प्रसिद्ध करण्यात करून नव्याने सुधारित मागणीपत्रे प्राप्त झाल्यानंतरच येईल, असे पत्रक आयोगाने काढले. परंतु, महिना उलटला तरी अद्याप जाहिरात प्रसिद्ध करण्यात आलेली नाही. 

काही महिन्यांपासून वरीलपैकी अशी अनेक कारणे स्पर्धा परीक्षा उमेदवारांना ऐकायला मिळत आहेत, लवकर जाहिरात प्रसिध्द झाली नाही तर काहींची वयोमर्यादा संपण्याची भीती आहे. जाहिरात प्रसिद्ध करण्यास अती विलंब होत असल्याने उमेदवारांमध्ये नैराश्य आणि संताप पसरलेला आहे. त्यामुळे राज्य सरकारशी समन्वय साधत सदर जाहिरात तत्काळ प्रसिद्ध करण्याची मागणी या पत्राद्वारे करण्यात आली आहे. 

अराजपत्रित संयुक्त गट-ब आणि गट-क जाहिरात 2024 तत्काळ प्रसिद्ध करण्यात यावी. अराजपत्रित संयुक्त गट-ब आणि गट-क पदांचे कट-ऑफ आणि मेरिट राज्यसेवा जाहिरातीप्रमाणे लावण्यात यावेत. तसेच सदर जाहिरात पंधरा दिवसांच्या आत प्रसिद्ध करण्यात यावी, अन्यथा महाराष्ट्रातील तमाम स्पर्धा परीक्षा उमेदवारांना संविधानीक मार्गाने आंदोलन करण्याशिवाय पर्याय उरणार नाही, असा इशारा समितीकडून देण्यात आला आहे.