Pharmacy Admission : फार्मसी प्रवेशासाठी दिवाळीपर्यंत थांबा ? ; काय आहे कारण

एज्युवार्ता न्यूज नेटवर्क 

राज्य सामाईक प्रवेश परीक्षा कक्षातर्फे (State Common Entrance Test Cell)बहुतांश सर्व व्यावसाईक अभ्यासक्रमांची प्रवेश प्रक्रिया (Professional course admission process)सुरू झाली आहे. मात्र, बी.फार्मसी व फार्म .डी. (B.Pharmacy and Pharm.D.)अभ्यासक्रमांची प्रवेश प्रक्रिया अद्याप सुरू झालेली नाही.त्यामुळे फार्मसी अभ्यासक्रम प्रवेशाच्या प्रतीक्षेत असलेल्या विद्यार्थ्यांमध्ये मोठा संभ्रम निर्माण झाला आहे. परंतु, फार्मसी काउंसिलने अद्याप महाविद्यालयांना ॲप्रुव्हल दिलेले नाही. परिणामी विद्यापीठांनी संबंधित महाविद्यालयांना ॲफिलेशन दिलेले नाही. या सर्व गोंधळामुळे फार्मसी अभ्यासक्रमाची प्रवेश प्रक्रिया (Pharmacy Course Admission Process) रखडली असून त्यास दोन ते तीन महिन्यांचा कालावधी लागू शकतो, असा अंदाज तंत्र शिक्षण संचालक कार्यालयातील अधिकाऱ्यांकडून व्यक्त केला जात आहे. 

कोविडनंतर फार्मसी अभ्यासक्रमास प्रवेश घेणाऱ्या विद्यार्थ्यांच्या संख्येत दिवसेंदिवस वाढ होत आहे.इयत्ता बारावीनंतर फार्मसी अभ्यासक्रमास प्रवेश घेणाऱ्या विद्यार्थ्यांची संख्या मोठी आहे.परंतु, इंजिनिअरिंग, हॉटेल मॅनेजमेंट, एमबीए ,लॉ ,एमसीए , ॲग्रीकल्चर, प्लॅनिंग अँड डिझायनिंग, बी.एड यासह बी.फार्मसी प्रॅक्टिस या अभ्यासक्रमाची प्रवेश प्रक्रिया सुरू केली.त्यातील काही अभ्यासक्रमाच्या प्रवेशाच्या एक ते दोन फेऱ्या झाल्या आहेत.मात्र फार्मसी अभ्यासक्रमाची प्रवेश प्रक्रिया रखडली आहे.विद्यार्थी व पालक प्रवेश प्रक्रियेच्या प्रतीक्षेत आहेत.मात्र, त्यांना तंत्र शिक्षण विभाग किंवा सीईटी सेलकडून याबाबतचे उत्तर मिळत नाही.त्यामुळे गोंधळाची स्थिती निर्माण झाली आहे. 

---------------------------

फार्मसी काउंसिल ऑफ इंडियाकडून ॲप्रुव्हलची प्रक्रिया अद्याप पूर्ण झालेली नाही.त्यामुळे फार्मसी अभ्यासक्रमाच्या प्रवेश प्रक्रियेस उशीर होत आहे.महाविद्यालयांचे ॲप्रुव्हल आणि विद्यापीठांच्या ॲफिलेशनची प्रक्रिया पूर्ण झाल्यानंतर फार्मसीचे प्रवेश सुरू होतील. 

- डी.व्ही. जाधव, सह संचालक, तंत्र शिक्षण , पुणे विभाग 

-------------------------------- 

फार्मसी काउंसिल ऑफ इंडियाने मागील आठवड्यात महाविद्यालयांच्या तपासणीसाठी समित्या येऊन गेल्या.अद्याप फार्मसी काउंसिलने महाविद्यालयांना ॲप्रुव्हल दिलेले नाही.हा प्रश्न केवळ महाराष्ट्रासाठीच अडचणीचा नाही तर भारतभरात हीच स्थिती आहे. त्यामुळे फार्मसी काउंसिल ऑफ इंडियाने याबाबत लवकर निर्णय घ्यावा.याच पध्दतीने काम सुरू राहिले तर प्रवेश प्रक्रिया सुरू होण्यास नोव्हेंबर उजाडेल.

- डॉ. राजेंद्र भांबर, प्राचार्य, एम.जी.व्ही.एम. औषधानिर्माणशास्त्र महाविद्यालय, नाशिक 

---------------------- 

फार्मसी काउंसिल ऑफ इंडियाकडून ॲप्रुव्हलची प्रक्रिया जून- जुलै महिन्यापूर्वी होणे गरजेचे आहे.त्यामुळे इंजिनिअरिंग, एमबीए आदी अभ्यासक्रमाप्रमाणे फार्मसी अभ्यासक्रमाची प्रक्रिया जुलै महिन्यात पूर्ण होऊ शकेल. तसेच विद्यार्थ्यांना अभ्यास करण्यास वेळ मिळेल.

- डॉ. एस.जी.खणगे, प्राचार्य, डॉ. एन.जी. पाऊल बुधे कॉलेज ऑफ फार्मसी, अहमदनगर 

----------------

नोव्हेंबर महिन्यात प्रवेश झाले तरीही या विद्यार्थ्यांना ९० दिवस अभ्यासक्रम पूर्ण करण्यासाठी द्यावा लागेल. वेळप्रसंगी सुट्टी न देता शनिवारी व रविवारी महाविद्यालय सुरू ठेवावे लागतील. तेव्हाच इतर अभ्यासक्रमाच्या विद्यार्थ्यांप्रमाणे फार्मसीच्या विद्यार्थ्यांची परीक्षा घेता येईल,असे सावित्रीबाई फुले पुणे विद्यापीठाच्या परीक्षा विभागातील प्रमुख अधिकाऱ्यांनी सांगितले. 

----------------------------------------------