NEET-PG चा पेपर पण लिक झाल्याचा दावा; NBEMS ची पोलिसात तक्रार 

एज्युवार्ता न्यूज नेटवर्क 

NEET PG परीक्षेला आता अवघे काही दिवस शिल्लक असताना आता या परीक्षेचे देखील पेपर लिक झाल्याचा दावा 'टेलिग्राम' (Telegram)या सोशल मीडिया प्लेटफॉर्म वरून केला जात आहे. या संदर्भात नॅशनल बोर्ड ऑफ मेडिकल एक्झामिनेशनने (National Board of Medical Examination- NBEMS) पोलिसात तक्रार देखील केली आहे. मात्र, NBEMS ने हे दावे खोटे असल्याचे म्हटले आहे. 

NBEMS ने आपल्या एका नोटीसमध्ये म्हटले आहे की ,  "NEET-PG चा पेपर लीक झाल्याचा खोटा दावा टेलिग्राम चॅनेलवर केला जात आहे. नॅशनल बोर्ड ऑफ मेडिकल एक्झामिनेशन (NBEMS) द्वारे प्रश्नपत्रिका अद्याप तयार करण्याचे काम बाकी आहे. NEET-PG 2024 च्या प्रश्नपत्रिका NBEMS द्वारे अद्याप सेट केलेल्या नाहीत. त्यामुळे सोशल मीडिया प्लॅटफॉर्मवर केलेले पेपर लीकचे दावे खोटे आहेत. पैशाच्या बदल्यात प्रश्न पत्रिका देण्याच्या नावाखाली उमेदवारांना फसवण्याचा प्रयत्न केल्याबद्दल अशा फसवणूक करणाऱ्या आणि त्यांच्या सहकाऱ्यांविरुद्ध पोलिस तक्रार दाखल केली आहे. तरी काही समाज कंटक लोक विद्यार्थ्यांना खोटी माहिती पुरवत आहेत. विद्यार्थ्यांनी अशा खोट्या महितीला बळी पडू नये."

"अशा कोणत्याही कृतीत प्रत्यक्ष किंवा अप्रत्यक्षपणे सहभागी असलेल्या किंवा तथ्यांची पडताळणी न करता अफवा प्रकाशित/प्रसारित करणाऱ्यांवर NBEMS द्वारे योग्य ती कारवाई केली जाईल, असा इशाराही NBEMS द्वारे देण्यात आला आहे.