विद्यापीठातील मुलींच्या सुरक्षेचा प्रश्न ऐरणीवर; अधिसभेचे कामकाज बंद 

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या आवारात राहणाऱ्या विद्यार्थीनीच्या सुरक्षेचा प्रश्न पुन्हा एकदा ऐरणीवर आला आहे.अंतरराष्ट्रीय विद्यार्थिनीना ऑनलाईन मागवलेले पार्सल देण्यासाठी आलेल्या तरुणाने विद्यार्थीनीच्या मनात लज्जा उत्पन्न होईल,असे गैरवर्तन केले. या घटनेचे पडसाद विद्यापीठाच्या अधिसभेत उमटले. त्यामुळे काही काळ विद्यापीठाचे कामकाज बंद पडले. त्यानंतर विद्यापीठाचे कुलगुरू डॉ.सुरेश गोसावी यांनी अधिसभेत निवेदन दिले. तसेच या घटनेची चौकशी करण्यासाठी समिती स्थापन करण्यात आली.

विद्यापीठाच्या अंतरराष्ट्रीय केंद्राच्या माध्यमातून विद्यार्थीनीची राहण्याची व्यवस्था एका इमारतीत केली आहे. मात्र, त्याठिकाणी CCTV आणि सुरक्षा रक्षक नसल्याने ही घटना घडल्याचे अधिसभेत काही सदस्यांनी सांगितले.अनेक सदस्यांनी यावर तीव्र भावना व्यक्त केल्या. तसेच या प्रकरणी दोषींवर कारवाई करण्याची मागणी केली. त्यानंतर कुलगुरू यांनी कारवाई करण्याचे आश्वासन दिले. त्यानंतर अधिसभेत कामकाज पुन्हा सुरू झाले.

दरम्यान, विद्यार्थीनीसमोर गैरवर्तन करणाऱ्या तरुणाला पकडून पोलिसांकडे तक्रार देण्यासाठी विद्यापीठाचे अधिकारी गेले होते.परंतु,काही कारणास्तव गुन्हा दाखल झाला नाही.त्यामुळे हा विषय अधिसभेचे सभागृह सुरू असताना उपस्थित करण्यात आला.त्यावर सभागृहात वादळी चर्चा झाली. तसेच विद्यापीठाच्या सुरक्षा विभागाच्या कर्मचाऱ्यांसह विद्यार्थीनी पोलिसांकडे तक्रार देण्यासाठी गेल्या. त्यानंतर संबंधित तरुणाला अटक करण्यात आली.