रसिकांसाठी ‘पुणे लिट फेस्ट’ची पर्वणी; १६ डिसेंबरपासून सुरूवात 

एज्युवार्ता न्यूज नेटवर्क 

पुणेकरांसाठी अगदी कमी कालावधीत आनंदोत्सव झालेल्या पुणे पुस्तक महोत्सवामध्ये (Pune Book Festival) यंदा सहा दिवस  ‘पुणे लिट फेस्ट’चे (Pune Lit Fest)आयोजन करण्यात आले आहे. त्यातील पहिले तीन दिवस मराठीत साहित्यिक, वैचारिक, शैक्षणिक कार्यक्रमाची रेलचेल राहणार आहे. त्यानंतर तीन दिवसांचे कार्यक्रम हिंदी आणि इंग्रजीत राहणार आहेत. या 'लिट फेस्ट’चे उद्घाटन बिहारचे राज्यपाल आरिफ मोहम्मद खान (Bihar Governor Arif Mohammad Khan)यांच्या हस्ते फर्ग्युसन कॉलेजमधील ॲम्फी थिएटरमध्ये येत्या १६ डिसेंबर सकाळी ११ वाजता रोजी होणार आहे. या निमित्ताने पुणेकरांना मराठी, हिंदी व इंग्रजी अशा तीन भाषांमधून चाळीसहून अधिक प्रज्ञावंतांचे विचार ऐकण्यासोबतच, त्यांच्याशी संवाद साधण्याची संधी मिळणार आहे, अशी माहिती पुणे पुस्तक महोत्सवाचे मुख्य संयोजक राजेश पांडे (Rajesh Pandey, Chief Organizer of Pune Book Festival)यांनी गुरुवारी पत्रकार परिषदेत सांगितली.

राष्ट्रीय पुस्तक न्यासाच्या (एनबीटी) पुणे पुस्तक महोत्सवाच्या अंतर्गत ‘पुणे लिट फेस्ट’च्या आयोजनाची माहिती देण्यासाठी आयोजित पत्रकार परिषदेत पांडे बोलत होते. यावेळी डेक्कन एज्युकेशन सोसायटीच्या नियामक मंडळाचे अध्यक्ष प्रमोद रावत, विश्व संवाद केंद्राचे अभय कुलकर्णी, प्रा. योगेश बोराटे, बागेश्री मंठाळकर, प्रसेनजित फडणवीस आदी उपस्थित होते. या लिटरेचर फेस्टिव्हलला सांस्कृतिक मंत्रालय, सावित्रीबाई फुले पुणे विद्यापीठ, समर्थ युवा फाऊंडेशन, पुणे महानगरपालिका यांचे सहकार्य लाभले आहे.

पांडे म्हणाले, पुणे पुस्तक महोत्सव १३ ते २१ डिसेंबर या कालावधीत फर्ग्युसन महाविद्यालयात होत आहे. त्या अंतर्गत ‘पुणे लिट फेस्ट’ने विद्वत्तापूर्ण विचारांच्या आदानप्रदानाची स्वतंत्र परंपरा निर्माण केली आहे. फर्ग्युसन कॉलेजच्या ॲम्फी थिएटरमध्ये येत्या १६ डिसेंबर ते २१ डिसेंबर या कालावधीत आयोजित ‘पुणे लिट फेस्ट’मध्ये विविध विषयांवरील मुलाखती व चर्चा रंगणार आहेत.

‘पुणे लिट फेस्ट’च्या पहिल्या तीन दिवसांमध्ये मराठी साहित्यविषयक सत्रांचे आयोजन करण्यात आले आहे. त्यात साहित्यिकांच्याच जोडीने प्रशासन, उद्योग, संशोधन, समाजकारण आदी क्षेत्रांमधील नामवंत व्यक्तींच्या साहित्यविषयक अभिरुची, तसेच त्यांच्या विचारविश्वाची प्रक्रिया जाणून घेता येईल. तर, १९ ते २१ डिसेंबर दरम्यान हिंदी व इंग्रजी साहित्यविश्वाशी संबंधित चर्चांच्या निमित्ताने उपस्थितांना परराष्ट्र मंत्री एस. जयशंकर, ‘बुकर’ पुरस्कार विजेत्या लेखिका बानू मुश्ताक, ज्येष्ठ पत्रकार एम. जे. अकबर, अभिनेता सचिन पिळगावकर, अभिनेत्री गिरीजा ओक आदी मान्यवरांचे विचार ऐकण्याची संधी मिळणार आहे, असे पांडे यांनी सांगितले.

 पुणे लिट फेस्टच्या मराठी साहित्यविषयक सत्रांमधील सहभागी मान्यवर 

शरणकुमार लिंबाळे, डॉ. वसंत शिंदे, जयंत उमराणीकर, प्रविण दीक्षित, आनंद देशपांडे (पर्सिस्टंट), अविनाश धर्माधिकारी, अश्विनी भिडे, हनुमंतराव गायकवाड, विलास शिंदे, अभिराम भडकमकर, अभिजित जोग, प्रशांत पोळ, प्रविण टोकेकर, श्रीकांत बोजेवार, सारंग दर्शने, प्रशांत दीक्षित, शेफाली वैद्य, श्रीधर लोणी, ऋषिकेश गुप्ते, नितीन थोरात, वंदना बोकिल-कुलकर्णी, विराजस कुलकर्णी, अभिषेक जाखडे, स्वानंदी सरदेसाई, उर्मिला निंबाळकर 
...

 पुणे लिट फेस्टच्या हिंदी व इंग्रजी साहित्यविषयक सत्रांमधील सहभागी मान्यवर 

रिकी केज, सिद्धार्थ काक, मुर्झबान श्रॉफ, श्रिया पिळगावकर, आमी गनत्रा, सिमिन पटेल, मिली अश्वर्या, अक्षत गुप्ता, आचार्य प्रशांत, बी. एस. नागेश, शाहिद सिद्दिकी, शम्स ताहिर, अजय बिसरिया, रुची घनश्याम 
.....

ग्रुप कॅप्टन शुभांशू शुक्ला संवाद साधणार 

भारतीय अंतराळ संशोधन संस्थेच्या (इस्रो) 'गगनयान' कार्यक्रमातील अंतराळवीर म्हणून ओळखले जाणारे हवाई दलाचे ग्रुप कॅप्टन शुभांशू शुक्ला यांनी जुलै २०२५ मध्ये आंतरराष्ट्रीय अंतराळ स्थानकाला भेट दिली. ही भारतासाठी अभिमानास्पद कामगिरी ठरली. शुक्ला हे अंतराळात जाणाऱ्या राकेश शर्मांनंतरचे दुसरे भारतीय ठरले आहेत. अशा ग्रुप कॅप्टन शुभांशू शुक्ला यांचे विचार ऐकण्याची आणि त्यांच्याही संवाद साधण्याची संधी २१ डिसेंबरला सकाळी ११ वाजता नागरिकांना मिळणार आहे.