पॉलिटेक्निक प्रवेशाचा मुहूर्त ठरला! २० मे पासून ऑनलाइन नोंदणी सुरू

एज्युवार्ता न्यूज नेटवर्क 

महाराष्ट्रातील अभियांत्रिकी आणि तंत्रशिक्षण क्षेत्रात करिअर करू इच्छिणाऱ्या विद्यार्थ्यांसाठी पॉलिटेक्निक प्रवेश प्रक्रियेला  (Polytechnic Admission Procedure) अखेर मुहूर्त मिळाला आहे. शैक्षणिक वर्ष २०२६-२७ (Academic year 2026-27) साठी प्रथम वर्ष पदविका अभ्यासक्रमांच्या (Diploma Courses) प्रवेश प्रक्रियेला २० मे २०२६ पासून सुरुवात (Starting from May 20) होणार आहे. तंत्र शिक्षण संचालनालयाने (DTE) याबाबत अधिकृत घोषणा केली. या प्रवेश प्रक्रियेत विद्यार्थ्यांना ऑनलाइन पद्धतीने अर्ज नोंदणी करता येणार आहे. उच्च व तंत्र शिक्षण मंत्री चंद्रकांत पाटील (Chandrakant Patil) यांनी प्रवेश प्रक्रिया वेळेत, पारदर्शक आणि नियोजनबद्ध रीतीने राबवण्याचे स्पष्ट निर्देश दिले आहेत.

मंत्री पाटील यांनी सांगितले की, दहावीनंतर तीन वर्षांचा पदविका अभ्यासक्रम पूर्ण केल्यानंतर विद्यार्थ्यांना थेट अभियांत्रिकी पदवीच्या दुसऱ्या वर्षात प्रवेश घेण्याची संधी मिळते. शिवाय उद्योग क्षेत्रातही चांगल्या नोकऱ्या उपलब्ध होतात. कॅम्पस प्लेसमेंटद्वारे अनेक विद्यार्थ्यांना महिन्याला एक लाख रुपयांपर्यंत पगाराच्या नोकऱ्या मिळाल्याचेही त्यांनी नमूद केले.

नव्या शैक्षणिक धोरणानुसार पदविका अभ्यासक्रमात महत्त्वाचे बदल करण्यात आले आहेत. आता विद्यार्थी मराठी आणि इंग्रजी या दोन्ही भाषांमध्ये शिक्षण घेऊ शकतील. अभ्यासक्रमात कौशल्य विकासावर विशेष भर देण्यात आला असून, कृत्रिम बुद्धिमत्ता (AI), ड्रोन तंत्रज्ञान, मशीन लर्निंग, डेटा अॅनालिटिक्स, इलेक्ट्रिक वाहन तंत्रज्ञान सारख्या आधुनिक विषयांचा समावेश करण्यात आला आहे. याशिवाय औद्योगिक प्रशिक्षणाचा कालावधी ६ आठवड्यांवरून १२ आठवड्यांपर्यंत वाढविण्यात आला आहे.

विद्यार्थ्यांनी अधिकृत वेबसाइट poly26.dtemaharashtra.gov.in वर जाऊन नोंदणी करावी, असे आवाहन तंत्र शिक्षण संचालनालयाने केले आहे. प्रवेश प्रक्रिया पूर्णपणे ऑनलाइन आणि गुणवत्तेवर आधारित असेल. ही प्रवेश प्रक्रिया विद्यार्थ्यांना लवकरात लवकर करिअरचे नियोजन करण्यास मदत करणारी ठरेल, असे शिक्षण क्षेत्रातील तज्ज्ञांचे मत आहे. इच्छुक विद्यार्थ्यांनी वेळेत नोंदणी करावी आणि अधिकृत सूचनांचे पालन करावे, असे आवाहन करण्यात आले आहे.